Հարավային Կորեայի ոստիկանությունը սկսել է հետաքննել ֆտորաջրածնային թթվի արտահոսքի պատճառները Samsung Electronics Co. ընկերության միկրոչիպերի արտադրման գլխավոր գործարաններից մեկում, որի հետևանքով զոհվել է աշխատողներից մեկը,- հաղորդում է «Ռենհապ» գործակալությունը:
Հետաքննության նյութերի համաձայն՝ ֆտորաջրածնային թթվի արտահոսք տեղի է ունեցել անցած կիրակի՝ տեղի ժամանակով ժամը 13.30-ին, Հարավային Կորեայի Հվասոն քաղաքում տեղակայված Samsung Electronics-ի գործարանում (մայրաքաղաք Սեուլից 60 կմ հարավ): Արտահոսքի հայտնաբերումից անմիջապես հետո Samsung Electronics-ի մասնագետները դիմել են STI Service ենթակապալառուին՝ վերանորոգման աշխատանքներ իրականացնելու համար:
Հարավային Կորեայի ոստիկանության փոխանցմամբ՝ ֆտորաջրածնային թթվի արտահոսքի վերացման աշխատանքները ավարտվել են տեղի ժամանակով ժամը 04.46-ին: Նախնական տվյալների համաձայն՝ պատահարի հետևանքով շրջակա միջավայր է արտանետվել շուրջ 10 լ թունավոր թթու: Վերանորոգման աշխատանքներից մի քանի ժամ անց STI Service-ի հինգ աշխատակիցներ, որոնք մասնակցել են արտահոսքի վերացմանը, գանգատվել են պարանոցի և կրծքավանդակի հատվածի ցավերից: Նրանք բոլորը հոսպիտալացվել են թունավորման ախտանիշով: Տուժածներից մեկը մահացել է:
Ներկա պահին ոստիկանությունը պարզում է թթվի արտահոսքի պատճառները: Բացի այդ, պարզվում է, թե գործարանի ղեկավարությունն ինչո՞ւ է պատահարի մասին համապատասխան պետական մարմիններին հայտնել վթարից մեկ օր հետո: Ընկերությունում հայտարարում են, որ շատ զբաղված են եղել արտակարգ պատահարի վայրում և այդ պատճառով չեն կարողացել նույնիսկ մտածել իշխանություններին տեղեկացնելու մասին:
