Խոսքի ազատության պաշտպանության կոմիտեի նախագահ Աշոտ Մելիքյանը, ներկայացնելով ԽԱՊԿ 2012թ. զեկույցը՝ Հայաստանում խոսքի ազատության վիճակի և լրագրողների ու ԶԼՄ-ների իրավունքների մասին, նշեց, որ 2012-ի ընտրություններում իրավիճակը շատ ավելի մեղմ էր, քան 2007-08-ին: Նրա խոսքով՝ այնուհանդերձ, ընտրություններին ընդառաջ՝ իրավիճակը կրկին սրվում է:
Աշոտ Մելիքյանը նշեց, որ ԱԺ ընտրությունների ժամանակ արձանագրվել է լրագրողների դեմ ֆիզիկական բռնությունների երեք դեպք, իսկ ՏԻՄ ընտրությունների ժամանակ՝ մեկ: 2011-ին գրանցված հինգ դեպքերի համեմատ թիվը նվազել է մեկով:
2011-ին լրագրողների և լրատվամիջոցների նկատմամբ գրանցվել է Ճնշումների 49, իսկ 2012-ին՝ 37 դեպք, իսկ տեղեկատվության իրավունքի խախտումները 23-ն էին` նախորդ տարվա 7-ի համեմատ:
Խոսքի ազատության պաշտպանության կոմիտեի նախագահի խոսքով՝ հնարավոր է, որ կոմիտեն ներառել է ոչ բոլոր արձանագրված փաստերը, խախտումների իրական թիվը շատ ավելին կարող է լինել, քանի որ լրագրողները միշտ չէ, որ հրապարակավ բարձրաձայնում են իրենց հանդիպած խոչընդոտների մասին: «Մենք, այնուամենայնիվ, շատ ուշադիր ենք, քանի որ տարբեր աղբյուրներից ենք ստանում այդ տեղեկությունները»,- հավելեց Աշոտ Մելիքյանը:
2011-ին 36 դատական հայցեր էին ներկայացվել դատարաններ՝ ընդդեմ լրատվամիջոցների, և բոլորը անխտիր՝ վիրավորանքի և զրպարտության հոդվածով: Սա ճնշում էր լրատվամիջոցների նկատմամբ: 2012-ին ընդամենը մեկ դեպքում է քաղաքական գործիչը դատի տվել բլոգերին:
Նա առանձնացրեց «Հայկական ժամանակ» օրաթերթի լրագրող Հայկ Գևորգյանի հետ կապված միջադեպը, երբ նրան տարօրինակ մեղադրանքով կալանավորեցին: Աշոտ Մելիքյանի խոսքով` այստեղ լրագրողական հանրությունը անտարբեր չմնաց, սատարեցին «Հայկական ժամանակ»-ին և պահանջեցին փոխել խափանման միջոցը, ինչը օգնեց Հայկ Գևորգյանին՝ ազատ արձակվելու: Սակայն երբ Հայկ Գևորգյանը դիմեց դատարան՝ բողոքելով անօրինական կալանավորման դեմ, նրա բողոքը մերժվեց, ինչը, ըստ Աշոտ Մելիքյանի, ճնշում էր լրագրողական հանրության նկատմամբ:
Նրա խոսքով՝ պետական ատյաններից տեղեկություններ ստանալու և տարածելու իրավունքի խախտումները աճում են հատկապես ընտրությունների օրերին:
Այսպիսով, ԽԱՊԿ նախագահի խոսքով՝ 2012-ին գրանցվել է լրագրողների նկատմամբ ֆիզիկական բռնության չորս դեպք, ԶԼՄ-ների և դրանց աշխատակիցների նկատմամբ՝ ճնշումների 37 դեպք, տեղեկություններ ստանալու և տարածելու իրավունքի խախտումների՝ 23 դեպք:
Լուսանկարը՝ PanARMENIAN Photo-ի
