Իրանի պաշտոնական ներկայացուցիչը հերքել է համացանցում տարածված տեղեկությունները «Ֆորդու» միջուկային օբյեկտում պայթյունի մասին,- հաղորդում է իրանական IRNA գործակալությունը:
Ավելի վաղ ամերիկյան WorldNetDaily (WND) վեբ կայքը, հղում անելով իրանական հատուկ ծառայությունների նախկին աշխատակից Համիդրեզ Զաքերիին, հրապարակել էր հաղորդագրություն այն մասին, որ «Ֆորդու» միջուկային օբյեկտի շուրջ 240 աշխատակից անցած երկուշաբթի օրը տեղի ունեցած պայթյունի հետևանքով թաղվել են գետնի տակ:
Իրանի ատոմային էներգիայի կազմակերպության ղեկավարի տեղակալ Սեիդ Շամսեդդին Բարբրուդին հերքել է այդ տեղեկությունը՝ հայտարարելով, որ ոչ մի պայթյուն էլ չի եղել:
ԱՄՆ-ը, մի շարք արևմտյան պետություններ և Իսրայելը Իրանին կասկածում են իր միջուկային ծրագիրը թաքցնելու մեջ: Թեհրանը ավելի վաղ չի հերքել, որ ուրան է հարստացնում մինչև 20%, սակայն հայտարարել էր, որ «Ֆորդու»-ում աշխատանքների նպատակը վառելիքի քանակությունը ավելացնելն է, որպեսզի Թեհրանի բժշկական ռեակտորը հավելյալ պահուստներ ունենա:
