Վրաստանի նախկին նախագահ Միխեիլ Սաակաշվիլին Արևմուտքին կոչ է արել աջակցել Ուկրաինային: Politico-ի համար գրած իր հոդվածում Սաակաշվիլին ընդգծել է «ուկրաինական դիմադրության և արևմտյան աջակցության օգնությամբ Ռուսաստանի նախագահ Վլադիմիր Պուտինին կանգնեցնելու» անհրաժեշտությունը: Նրա խոսքով՝ Ռուսաստանի ղեկավարի նպատակն է «կոտրել» ուկրաինական անկախ ժողովրդավարությունը, և եթե Արևմուտքը դա թույլ տա, «ուղղակի կորուստներ» կունենա:
Սաակաշվիլին նշում է, որ Վաշինգտոնի և Բրյուսելի ուշադրությունը ուղղվել է ԴԱԻՇ (Իրաքի և Շամի իսլամական պետություն) ահաբեկչական խմբավորման խնդրին: Արդյունքում՝ Արևմուտքում շատերն իրենց հարցնում են՝ կարո՞ղ են արդյոք իրենց թույլ տալ միաժամանակ պայքարել երկու խոշոր մրցակիցների դեմ, գրում է Սաակաշվիլին:
Սաակաշվիլին արևմտյան երկրներին կոչ է անում հետևել ԱՄՆ նախկին պետքարտուղար Հիլարի Քլինթոնի, սենատոր Ջոն Մըկքեյնի և այլ փորձագետների խորհրդին և Ուկրաինային ռազմական աջակցություն ցուցաբերել:
Սաակաշվիլին ոչ պակաս կարևոր է համարում տնտեսական օգնությունը Կիևին: «Ուկրաինային ֆինանսական աջակցությունը հետագա բարեփոխումների և կոռուպցիայի դեմ լուրջ պայքարի պայմանով անհրաժեշտ է»,- ասվում է հոդվածում:
Բացի դրանից՝ Սաակաշվիլին կոչ է անում վերջ տալ Մոսկվայի նկատմամբ պատժամիջոցային ռեժիմի թեթևացման մասին քննարկումներին:
