ՆԱՏՕ-ի գլխավոր քարտուղար Յենս Ստոլտենբերգը հանդես է եկել Ռուսաստանի հետ քաղաքական երկխոսության շարունակման օգտին։ Համապատասխան հայտարարությամբ է նա հանդես եկել այս տարվա առաջին մամլո ասուլիսի ժամանակ։ Այս մասին փոխանցում է TASS գործակալությունը։
Մասնավորապես, գլխավոր քարտուղարը նշել է, որ աշխատանք է տարվում փետրվարին անվտանգության հարցերով Մյունխենի համաժողովի ժամանակ Ռուսաստանի արտգործնախարար Սերգեյ Լավրովի հետ հնարավոր հանդիպման ուղղությամբ։ Համաժողովը Բավարիայի մայրաքաղաքում կանցկացվի փետրվարի 6-8-ը։
«ՆԱՏՕ-ն դադարեցրել է գործնական համագործակցությունը Ռուսաստանի հետ, սակայն շատ կարևոր է, որ հաղորդակցության ուղիները բաց մնան»,- ասել է դաշինքի ղեկավարը։
Ուկրաինական հակամարտությանը ռազմական լուծում չկա, այն կարելի է կարգավորել միայն խաղաղ ճանապարհով՝ ասել է Ստոլտենբերգը՝ հավելելով, որ անհրաժեշտ է բանակցային ճանապարհով խաղաղ լուծում Մինսկի համաձայնագրի հիման վրա։
