Հունվարի 25-ին Երևանի «Կոնգրես» հյուրանոցում Քաղաքական և միջազգային հետազոտությունների հայկական կենտրոնը ԱՄՆ ազգային-ժողովրդավարական ինստիտուտի հետ համատեղ կազմակերպել էր բանավեճ՝ նվիրված առաջիկա նախագահական ընտրություններում թեկնածուների կողմից ներկայացված ծրագրերին: Մասնավորապես, արծարծվեց այն հարցը, թե որքանով են սովորական ընտրողին հետաքրքիր այդ ծրագրերը, մանավանդ այն պարագայում, որ ծրագրերում ներկայացվում է ապագայի մի իդեալական պատկեր, որին հասնել հինգ տարվա ընթացքում պարզապես անհնար է:
Բանավեճին մասնակցում էին Սերժ Սարգսյանի ներկայացուցիչ Հովհաննես Սահակյանը, Րաֆֆի Հովհաննիսյանի ներկայացուցիչ Արմեն Մարտիրոսյանը և Հրանտ Բագրատյանի ներկայացուցիչ Սոս Գիմիշյանը: Ուշագրավ է, որ բանախոսներից միայն Արմեն Մարտիրոսյանը միանշանակ դիրքորոշում ներկայացրեց Վլադիմիր Պուտինի Մաքսային միության վերաբերյալ՝ ասելով, որ այդ միությանն անդամակցելը դեմ է Հայաստանի ազգային շահերին, և իրենց կուսակցությունը կողմ է ԵՄ-ի հետ Խորը և համապարփակ ազատ առևտրի և Քաղաքական ասոցացման պայմանագրերի կնքմանը:
Մյուս երկու բանախոսներն ամեն կերպ խուսափեցին միանշանակ և հստակ պատասխաններից նույնիսկ այն ժամանակ, երբ տրվեց ճշգրտող հարց՝ այո կամ ոչ:
