Թուրքական «Ջումհուրիյեթ» օրաթերթի սյունակագիր Օրհան Բուրսալըն իր հոդվածում անդրադարձել է Հրանտ Դինքի մահվան 8-րդ տարելիցի օրը Թուրքիայի տարբեր քաղաքներում բազմաթիվ երթերի ու հանրահավաքների ժամանակ հնչած կարգախոսներին։
«Հրանտ Դինքի մահվան տարելիցի օրը Հայոց ցեղասպանության վերաբերյալ կարգախոսներն անտեղի են։
Արդյոք ինքը՝ Հրանտը, դրան կողմ կլինե՞ր։ Նա չէր ցանկանում սրել հայ-թուրքական հարաբերությունները՝ հաճախ թուրքերեն հոդվածներում նույնիսկ խուսափելով «ցեղասպանություն» եզրից։ Իհարկե գիտենք, որ Դինքը Ցեղասպանության վերաբերյալ իր մոտեցումը հստակ արտահայտել է «Ռոյթերս» լրատվական գործակալությանը տված հարցազրույցում, երբ ասում էր. «Այո´, 1915-ին տեղի ունեցածը ցեղասպանություն է, քանի որ 4 հազար տարի այս հողերում ապրած մի ժողովուրդ և նրա քաղաքակրթությունն արդեն չկան»։ Սակայն «Դինքի ընկերներ» խումբը չպետք է նրա հիշատակին նվիրված միջոցառումները կապի Ցեղասպանության հետ»,- նշում է հոդվածագիրը։
Հոդվածի վերջում Բուրսալըն գրում է. «Այժմ հիմնական հարցը։ Ի վերջո, ո՞ւմ ջրաղացին են ջուր լցնում «Հրանտի ընկերները»։ Չէ՞ որ ոմանք, դուրս գալով գյուլենականների շարքերից և դավաճանելով իրենց ընկերներին, վարչապետի խորհրդական են դառնում (հոդվածագիրն ակնարկել է Թուրքիայի վարչապետի խորհրդական, ազգությամբ հայ Էթյեն Մահչուպյանին.- խմբ.)»։
Հիշեցնենք, որ «Ակօս» շաբաթաթերթի նախկին խմբագրապետ, հասարակական գործիչ Հրանտ Դինքը սպանվել է 2007 թվականի հունվարի 19-ին Ստամբուլում։ 5 տարի շարունակվող կողմնակալ և բազմաթիվ քննադատությունների արժանացած դատավարությունից հետո` 2012 թվականի հունվարի 17-ին, հրապարակվեց առաջին դատավճիռը։ Սպանությունն իրականացրած Օգյուն Սամասթը, որի գործը քննում էր Անչափահասների գործերով դատարանը, դատապարտվեց 21 տարի 6 ամիս ազատազրկման։ Դինքի սպանության մասնակիցներից Յասին Հայալը դատապարտվեց ցմահ ազատազրկման։ Սպանության կազմակերպիչներից Էրհան Թունջելը Դինքի սպանության առաջին գործով անմեղ է ճանաչվել, սակայն երկրորդ գործով կալանավորված է։
Այժմ Դինքի սպանության գործով նոր դատավարություն է ընթանում, որը նույնպես քննադատությունների է արժանանում: Այս ընթացքում նոր ձերբակալություններ են եղել, մասնավորապես՝ անվտանգության աշխատակիցների շրջանում, ինչը նախկին դատավարության ժամանակ շրջանցվել էր։
Մեկ շաբաթ առաջ՝ հունվարի 19-ին, Թուրքիայի տարբեր քաղաքներում Հրանտ Դինքի մահվան 8-րդ տարելիցի կապակցությամբ զանազան երթեր ու հանրահավաքներ են անցկացվել, որոնց ընթացքում բազմաթիվ քաղաքացիներ հանդես են եկել նաև Հայոց ցեղասպանության վերաբերյալ կարգախոսներով։
