Երկու բրազիլացի լեռնագնաց զոհվել են ուղղահայաց ժայռով իջնելիս, նրանց 5 ընկերներ վնասվածքներ են ստացել մեղուների պարսի հարձակման հետևանքով: Դեպքը տեղի է ունեցել շաբաթ օրը Բրազիլիայի հարավում՝ Պորտու Ալեգրի քաղաքից 130 կմ հեռու, հայտնում է TASS-ը:
Իջնելիս լեռնագնացների վրա հանկարծ վայրի մեղուների պարս է հարձակվել: Լեռնագնացներից ոչ մեկին չի հաջողվել մնալ ժայռի վրա: Նրանցից երկուսը մահացել են: Համեմատաբար թեթև վնասվածքներ ստացած երկու սպորտսմենները հասել են մոտակա բնակավայր և օգնություն խնդրել: Կիրճից, որտեղ բջջային հեռախոսակապ չի եղել, նրանք դուրս են եկել մոտ 12 ժամում: Փրկարարները մնացած վիրավորներին ուղղաթիռով տարհանել են: տուժածներից մեկի վրա, որը ծանր վիճակում է, բժիշկները մեղվի 150 խայթոց են հաշվել:
50-ական թթ. հատուկ Բրազիլիա են տարվել աֆրիկյան մեղուներ, որոնք հայտնի են իրենց բարձր արտադրողականությամբ: Սակայն փորձի հեղինակները հաշվի չեն առել, որ աֆրիկյան մեղուներն ավելի դյուրագրգիռ ու ագրեսիվ են, իսկ նրանց թույնը շատ ավելի վտանգավոր է: Ավելի ուշ պարզվել է, որ այդ անցանկալի հատկությունները պահպանվում են խաղաղ «աբորիգեն-մեղուների» հետ խաչասերումից հետո:
Նոր մեղուն շատ դժվար վերահսկելի է: Այն հաճախ է լքում բույնն ու ավելի ագրեսիվ է մարդու մոտենալու դեպքում:
