«Թուրք հասարակությունը ընկղմված է սեքսի մեջ»,- Die Welt-ը մեջբերում է հայտնի թուրք լրագրող Մեհմեթ Ալի Բիրանդի խոսքերը, որն օրեր առաջ հեռացավ կյանքից:
Լրագրողի վերջին նյութերից մեկը նվիրված էր Թուրքիայում մարմնավաճառության խնդրին: Թուրքիան վերջերս է ճանաչվել պոռնոկայքերի դիտումների քանակով համաշխարհային առաջատարներից մեկը: Եվ զարմանալի չէ, որ ՁԻԱՀ-ով հիվանդների թիվն աճել է: Իրավիճակը ստիպել է ուկրաինացի կանանց պիկետ անցկացնել Կիևում Թուրքիայի դեսպանության շենքի առջև՝ իրենց բողոքն արտահայտելով «կենդանի ապրանքի» նկատմամբ թուրքերի ծայրաստիճան բարձր հետաքրքրության դեմ:
Լրագրողը կարծում է, որ բարդացող իրավիճակի մեղավորը ոչ թե թուրք տղամարդկանց սեքս-ուխտագնացությունն է արտերկիր, այլ տեղի իշխանությունների վարած քաղաքականությունը: Կառավարությունը զգալիորեն կրճատել է օրինական հասարակաց տների թվաքանակը, որոնք Թուրքիայում թույլատրված էին դեռևս անցած դարի 30-ականներին: 90-ականներին Ստամբուլում հաշվվում էր 50 հասարակաց տուն, որոնց աշխատակիցները մշտապես ենթարկվում էին բուժզննման, սակայն հիմա հասարակաց տների թվաքանակը 11 է: Նվազեցվում է նաև գրանցված սեքս-աշխատակիցների թվաքանակը, քանի որ պաշտոնական Անկարան դադարեցրել է աղջիկներին նման աշխատանքի թույլտվություն տալ:
Սա բարենպաստ պայմաններ է ստեղծում անօրինական մարմնավաճառության աճի համար՝ երկիրը վերածելով կենդանի ապրանքի առևտրի կենտրոնի: Ի դեպ, սեքս-ստրուկների մեծ մասը ծագումով նախկին ԽՍՀՄ հանրապետություններից են: