ԱՄՆ նախագահ Բարաք Օբամայի վարկանիշը 2013-ի հոկտեմբերից ի վեր հասել է ռեկորդային ցուցանիշի: Այս մասին գրում է The Wall Street Journal-ը՝ հղում անելով WSJ/NBC-ի նոր համատեղ հարցմանը: Ներկայումս պետության ղեկավարի գործունեությանը հավանություն է տալիս ամերիկացիների 46 տոկոսը: Ինչպես նշում է պարբերականը, նման ցուցանիշի հասնել Օբամայի հաջողվել է Կուբային և միգրացիոն հարցերին առնչվող որոշումների շնորհիվ:
Հավանայի հետ դիվանագիտական հարաբերությունների վերականգնմանը դրական գնահատական է տվել պատասխանողների 60 տոկոսը: Պարբերականն ուշադրւթյուն է դարձնում այն հանգամանքին, որ Օբամայի նման քայլերը հավանության են արժանացել բնակչության նույնիսկ այն խմբերի կողմից, որոնք հազվադեպ են աջակցություն հայտնում ԱՄՆ նախագահին: Մասնավորապես, դրանք հարավային նահանգների բնակիչներն են ու 65 և ավելի բարձր տարիքի քաղաքացիները:
Պարզվել է նաև, որ բնակիչների 49 տոկոսն աջակցում է նախագահի տնտեսական որոշումներին:
Հարցումն անցկացվել է հունվարի 14-17-ը, հետազոտությանը մասնակցել են 800 մեծահասակ ամերիկացիներ:
