ԱՄՆ նախագահ Բարաք Օբաման երեքշաբթի օրը հանդես կգա Կոնգրեսին հղված ավանդական ուղերձով՝ «Երկրի վիճակի մասին»: Այս մասին հայտնում է Ria Novosti-ն: Դա կլինի նրա նախավերջին նման ելույթը. վերջին ուղերձով նա հանդես կգա հաջորդ տարվա ձմռանը, իսկ 2016թ. ընտրություններից հետո ժողովրդին կդիմի երկրի նոր նախագահը:
ԱՄՆ նախագահի գլխավոր ելույթի համար կոնգրեսի շենքում հավաքվածների թվում կլինեն երկրի փոխնախագահ Ջո Բայդենը, սենատորներ և Ներկայացուցիչների պալատի անդամ, նաև գործնականում բոլոր նախարարները:
Որպես կանոն, «Երկրի վիճակի մասին» ելույթում հիմնական ուշադրությունը հատկացվում է ներքին քաղաքականությանը: Համենայնդեպս, Օբամայի օրոք գործնականում միշտ այդպես է եղել:
Սպասվում է, որ երկրի ղեկավարը ուշադրությունը կսևեռի անցած տարում իր վարչակազմի ձեռքբերումների վրա:
Անխոս, Օբաման կփորձի հայրենակիցներին վստահեցնել, որ ԱՄՆ ազգային տնտեսությունը շարունակում է աճել: Դա, անշուշտ, ճիշտ է, բայց փորձագետների պնդմամբ՝ զարգացման տեմպերը դեռ այնքան էլ արագ չեն, իսկ վերականգնման գործընթացը՝ չափազանց փխրուն:
Գրեթե յուրաքանչյուր ելույթի ժամանակ Օբաման խոսում է նոր աշխատատեղերի ստեղծման մասին՝ ուշադրությունը սևեռելով բիզնեսին աջակցելու իր վարչակազմի ջանքերին, ինչպես նաև օրենսդիր իշխանության անգործությանը: Սպասվում է, որ առաջիկա ելույթը ևս բացառություն չի լինի:
Էմիգրացիոն բարեփոխումը ևս կլինի ելույթի հիմնական թեմաներից:
Իսկ արտաքին քաղաքականության ոլորտի գլոբալ խնդիրների թվում հիմնական տեղում կլինի ահաբեկչական խմբավորումների, մասնավորապես՝ ԴԱԻՇ-ի («Իրաքի և Շամի իսլամական պետություն») դեմ պայքարը: Օբաման, հավանաբար, կպնդի իր օդային հարվածների քաղաքականությունը, մինչդեռ ոմանք, հատկապես՝ հանրապետականները, նրանից ցամաքային գործողության իրականացում են պահանջում:
Հավանաբար, Օբաման կխոսի նաև Իրանի մասին: ԱՄՆ Կոնգրեսը խոստանում է օրենք ընդունել, որը երկրի ղեկավարին թույլ կտա նոր պատժամիջոցներ սահմանել Թեհրանի դեմ, եթե Իրանի միջուկային ծրագրի հարցով բանակցություններն արդյունք չտան: Բայց Օբաման այնքան էլ գոհ չէ դրանից: Նա օրենսդիրներին խնդրել է «համբերություն ցուցաբերել» և բանակցողներին հնարավորություն տալ ավարտել իրենց աշխատանքը: