«Իմ ունեցած տեղեկությունների համաձայն՝ նրա գործն արդեն վերանայվել և ուղարկվել է Թբիլիսի, այսինքն մոտ օրերս Վահագնը ազատ կարձակվի: Մենք սպասում ենք և շատ հնարավոր է, որ դա լինի հենց վաղը»,- «Առաջին լրատվական»-ի հետ զրույցում ասաց Չախալյանի փաստաբան Ստեփան Ոսկանյանը, ապա հավելեց. «Նրան օրեր առաջ եմ այցելել: Ասեմ, որ համաներման ակտը տարածվում է նաև այն հոդվածների վրա, որոնցով որ իրեն հասցեագրված մեղադրանքը ներկայացված էր: Համաներման կետում կա մի դրույթ, որը նախատեսում էր անմիջապես ազատ արձակել քաղբանտարկյալ ճանաչված անձանց: Բայց Վահագն Չախալյանը,ցավոք սրտի, քննարկումների արդյունքում դուրս եկավ այդ դրույթից: Իսկ հիմա խորհրդարանում կրկին քննարկվում է նրա քաղբանտարկյալ լինել-չլինելու հանգամանքը՝ նա նորից այդ պահանջով դիմում է ներկայացրել»:
Փաստաբան Ոսկանյանը նաև նշեց, որ հնարավոր է նա դուրս գա որպես քաղբանտարկյալ, եթե մինչ այդ խորհրդարանը հաստատի այդ հանգամանքը. «Հնարավոր է նաև որպես քաղբանտարկյալ, բայց ճիշտն ասած՝ քիչ հավանական եմ համարում»:
