Ռուսաստանի հայերի միության նախագահ Արա Աբրահամյանի ու նրա տեղակալ Լևոն Մուկանյանի դեմ ստորագրահավաք է սկսվել։
Հանձնագրի տեքստում մասնավորապես ասվում է. «Մենք՝ ռուսաստանաբնակ և ազգի ու պետության համար մտահոգ բոլոր այլ հայերս, պահանջում ենք Ռուսաստանի հայերի միության ղեկավարներից՝ հանձինս միության նախագահ Արա Աբրահամյանի և նրա կամակատար փոխնախագահ Լևոն Մուկանյանից, կամավոր հրաժարվել իրենց պաշտոններից:
Այս տարիների ընթացքում՝ այն օրվանից, երբ այդ մարդիկ ստանձնեցին Ռուսաստանի հայ համայնքի գլխավոր միության դերը, այդ համայնքը գրեթե չի զարգանում: Ռուսաստանի սփյուռքի բոլոր ձեռքբերումներն ու նվաճումները եղել են շնորհիվ տարբեր կազմակերպությունների, որոնք չեն ֆինանսավորվում ՌՀՄ-ի կողմից: ՌՀՄ-ի գլխավոր նպատակը Ռուսաստանի իշխանությունների շահերին, այլ ոչ թե Հայաստանին և Ռուսաստանի սփյուռքին ծառայելն է:
Ստրկամիտ կազմակերպությունը չի ծավալում որևէ կազմակերպչական գործունեություն Ռուսաստանի հայերի, նրանց ազգային դաստիարակության համար: Ռուսաստանի սփյուռքը ձուլվում է սարսափելի արագությամբ, երիտասարդության մի մասը չի խոսում իր մայրենի հայերեն լեզվով, հեռանում է հայկական մշակութից և ավանդույթներից, և այդ երեվույթների դեմն առնելու համար ՌՀՄ-ն ոչինչ չի ձեռնարկում, վարելով ապազգային քաղաքականություն:
ՌՀՄ-ն որևէ քննադատական հայտարարություն չարեց՝ երբ Ռուսաստանը հրաժարվեց Հայաստանին հանձնել Գյումրիում 6 մարդու սպանության մեջ մեղադրվող Վալերի Պերմյակովին: Նա ընդհանրապես անտեսեց այդ ոճրագործությունը և չցանկացավ ընդհատել իր գիշերային ակումբների զվարճանքներն ու համերգները: Միակ արձագանքողը եղավ Լևոն Մուկանյանը, ով սոցցանցերում կոչ էր անում հեռու մնալ հակառուսական քաղաքականությունից, իսկ արդարություն պահանջող ցուցարարներին էլ մեղադրեց խամաճիկային պահվածքի մեջ: Այս ամենը հայերի համբերության վերջին կաթիլն էր:
Մենք կոչ ենք անում ժողովրդի ապագայի մասին սրտացավ բոլոր հայերին և հայկական կազմակերպություններին իրենց հասանելի բոլոր միջոցներով նպաստել Արա Աբրահամյանի և Լևոն Մուկանյանի հրաժարականներին:
Դրանից հետո մենք պետք է ընտրենք այն մարդկանց, որոնք ի վիճակի կլինեն իրենց վրա վերցնել Ռուսաստանի հայ համայնքի կազմակերպման և ազգային գաղափարների տարածման պարտականությունը և ստանձնել Հայաստանի Հանրապետության ու հայ ազգի իրավունքների պաշտպանի դերը»: