Ճապոնիայում ոստիկանությունը ձերբակալել է Ben Line Agencies Japan նավարկային ընկերության երեք աշխատակցի: Ինչպես հաղորդում է Reuters-ը, նրանք կասկածվում են անօրինական գումարներ փոխանցելու մեջ մի ընկերության, որը, հավանաբար, մասնակցում է Իրանի միջուկային ծրագրին:
Խոսքը Իրանի IRISL պետական ընկերության սինգապուրյան դուստր ձեռնարկության մասին է: 2011 թ. նոյեմբերին և 2012 թ. փետրվարին կասկածյալները, ենթադրաբար, դրա հաշվին փոխանցել են շուրջ 158 հազար դոլար՝ չստանալով համապատասխան թույլտվություն Ճապոնիայի իշխանություններից: Տվյալ քայլը խախտում է պատժամիջոցները, որոնք 2010 թ. սեպտեմբերին Ճապոնիան սահմանել էր Իրանի դեմ: Պատժամիջոցների թվին է պատկանում նաև IRISL ակտիվների սառեցումը և ընկերության հետ ֆինանսական գործարքների արգելափակումը:
Ճապոնիայում սա ձերբակալության առաջին դեպքն է, որը կապված է Իրանի միջուկային ծրագրի հետ:
Ben Line Agencies Japan-ի ներկայացուցիչը հայտարարել է, որ իր ընկերությունը չի կարող մեկնաբանել իրավիճակը:
