ԵՄ երկրները հավատարիմ են միջազգային կանոններին և դեմ են ցանկացած գործողությունների, որոնք կարող են սրել իրավիճակը: Ինչպես հաղորդում է Trend գործակալությունը, այս մասին հայտարարել է Ադրբեջանում ԵՄ առաքելության ղեկավար Ռոլան Կոբիան՝ անդրադառնալով Ստեփանակերտի օդանավակայանի բացման հարցին:
«Մենք կցանկանայինք աջակցել հակամարտող կողմերի երկխոսությանը: Կարևոր է մնալ միջազգային օրենսդրության շրջանակներում և խուսափել ցանկացած քայլից, որը լարվածություն է ստեղծում տարածաշրջանում: Մենք պետք է ձգտենք երկխոսության»,- ասել է Կոբիան:
Նշենք, որ մոտ ապագայում նախատեսվում է գործարկել Ստեփանակերտի օդանավակայանը:
Հիշեցնենք, որ օրեր առաջ Ադրբեջանի կառավարությունը հաստատել է «Ադրբեջանի Հանրապետության օդային տարածքի օգտագործման մասին» օրենքը: Նոր օրենքի համաձայն՝ Ադրբեջանի օդային տարածքում առանձնացվում են արգելված և սահմանափակ գոտիներ: Այդպիսին կարող է ճանաչվել ցանկացած հատված, եթե պետական քաղաքացիական օդագնացության վարչությունը համապատասխան որոշում ընդունի: Ուստի օդային սահմանը հատողներին պատիժ է սպառնում` ընդհուպ մինչև ինքնաթիռների ոչնչացում:
