Ուգո Չավեսի եղբայրը՝ Արհենիսը, հերքել է տեղեկությունն այն մասին, թե նա, իբր, հայտարարել է նախագահի շուտափույթ վերադարձի մասին:
«Արհենիս Չավեսը հերքում է ավելի վաղ ԱՄՆ-ի Associated Press գործակալության տարածած տեղեկությունը, համաձայն որի՝ նա հաղորդել է , որ եղբայրը՝ հանրապետության նախագահ Ուգո Չավեսը, առաջիկա օրերին երկիր կվերադառնա»,- ասվում է էլեկտրաէներգետիկայի ազգային կորպորացիայի՝ Corpoelec-ի կայքում: Այս մասին հայտնում է RIA Novosti-ն և հավելում, որ կորպորացիայի ղեկավարն է Արհենիս Չավեսը:
Նախագահի եղբայրը նշել է, որ նման տեղեկությունների հրապարակումը կառավարության պաշտոնական ներկայացուցիչների իրավասության մեջ է:
Նա նշել է, որ նման լիազորություններ ունեն փոխնախագահ Նիկոլաս Մադուրոն և կապի ու տեղեկատվության նախարար Էռնեստո Վիլիեգասը: Չավեսի եղբայրը նշել է, որ պետության ղեկավարի՝ երկիր վերադարձի մասին որոշումը կախված է նրան բուժող բժիշկներից:
Բոլիվարական հանրապետության ղեկավարի առողջության մասին լավ նորություններ է հայտնել երկրի արտգործնախարար Էլիաս Հաուան: Հավանա այցի ժամանակ նա իր կուբացի գործընկեր Բրունո Ռոդրիգեսի հետ քննարկելէ երկկողմ հարաբերություններն ու այցելել Չավեսին: Նրա խոսքով՝ Չավեսը որոշումներ է ընդունում, կատակում և ծիծաղում:
Երեկ փոխնախագահ Մադուրոն էլ հաղորդել է, որ Չավեսն ավարտում է վերականգնման հետվիրահատական փուլն ու սկսում բուժման նոր փուլ:
