Միլիարդատեր Ուորեն Բաֆեթը կարծում է, որ ԱՄՆ դաշնային բյուջեի պակասուրդը պետք է կայունացվի տնտեսական աճով, 16,4 տրլն դոլար պետպարտքը անհանգստության պատճառ չէ՝ փոխանցում է vestifinance.ru-ն:
«Այնքան էլ լավ բան չէ, որ պարտքը մեծանում է ՀՆԱ-ի նկատմամբ: Դա հարկավոր է կայունացնել, սակայն պարտքն ինքնին խնդիր չէ»,- ասել է Բաֆեթը CBS-ի հետ զրույցում:
Նա նկատել է, որ պարտքի հարաբերակցությունը ԱՄՆ-ի ՀՆԱ-ի նկատմամբ ներկայում ավելի քիչ է, քան Երկրորդ համաշխարհային պատերազմի ավարտին: Բաֆեթը ներկայում հանդես է գալիս հարուստների համար հարկերի բարձրացման առաջարկով:
«Ուզում եմ ասել, որ երկրում ոչ ոք չպետք է լինի քաղցած, ոչ ոք չպետք է մնա առանց կրթության, ծերության տարիներին ոչ ոք չպետք է անհանգստանա բժշկական օգնության համար»,- հայտարարել է Berkshire Hathaway ընկերության գլխավոր տնօրենը:
82-ամյա Բաֆեթը շտապել է հավելել, որ ինքը չի կարծում, որ ընդհանուր հարստությունը նվազեցնում է նորարարությունների հանդեպ ձգտումը: Նա նկատել է, որ իր դիրքորոշումը չի նշանակում, որ ինքը «որոնում է արդյունքների հավասարություն»:
«Դուք մեծ արդյունքներ եք ուզում անհավասարությունից, դուք ուզում եք ավտոտնակներում աշխատող Սթիվ Ջոբս կամ Դեյվ Պիկարդ, կամ Բիլ Գեյթս: Բայց դուք չեք ուզում, որպեսզի ինչ-որ մեկը պառկի քաղցած կամ չունենա բժշկական օգնություն ստանալու հնարավորություն»,- ասել է միլիարդատերը:
