ՀԱԿ-ը նվիրյալների բանակ է, որը նվազել է. այսօր լրագրողների հետ հանդիպման ժամանակ այս մասին ասաց «Ժողովրդավարական հայրենիք» կուսակցության ղեկավար Պետրոս Մակեյանը: Ըստ նրա՝ ՀԱԿ-ը ՀՀ պայքարող քաղաքացիների շերտն է, որը նվազել է: Նրա խոսքով՝ ՀԱԿ-ում կան շատ մարդիկ, որոնց իրենք ցանկանում են ուղղորդել:
Անդրադառնալով իր և ՀԱԿ համակարգող Լևոն Զուրաբյանի հակասության մասին խոսակցություններին՝ նա ասաց, որ որևէ անձնական խնդիր որևէ մեկի հետ՝ թե՛ ընդդիմության, թե՛ իշխանության դաշտում, չի ունեցել:
«Այլ բան, որ իմ ուղիղ, կտրուկ խոսքն ընդունել են՝ որպես անձնական: ՀԱԿ-ում կան առողջ դեմքեր, ՀԱԿ-ի նման որոշակի ռեսուրս ունեցող կառույցը պետք է պահպանել և վերականգնել՝ դարձնել քաղաքական գործոն:
Լևոն Տեր-Պետրոսյանը թեև հայտարարություն արել է, բայց, իմ դիտարկումներով, նա դեռևս քաղաքական պրոցեսներում է, իսկ մեր քաղխորհրդի առաջարկը հետևյալն էր՝ քննարկել ներկայումս, թե ինչ կարելի է անել իրավիճակ փոխելու համար»,- ասաց Պետրոս Մակեյանը:
