Լոռու մարզի ընդհանուր իրավասության դատարանը Սուրեն Բաղդասարյանի նախագահությամբ բժշկական բնույթի հարկադրական միջոց է կիրառել անմեղսունակության վիճակում հանրորեն վտանգավոր արարք կատարած Վարազդատ Ա.-ի նկատմամբ:
Մինչ 64-ամյա Վարազդատի հոգեկան առողջության հարցի պարզումը՝ նրա արարքը որակվել էր որպես սպանության փորձ:
Տուժող Համլետ Մ.-ն հայտնել է հետևյալը:
2014 թվականի օգոստոսի 26-ին, առավոտյան ժամը 7-ին աշխատանքի գնալու ճանապարհին նա զգացել է, որ ինչ-որ մեկը հետևում է իրեն:
Շրջվել ու տեսել է անծանոթ մի տղամարդու: Վերջինս կանգ է առել ու հարցրել. «Դու ո՞վ ես, մերոնցի՞ց ես»:
Տուժողը հարցին հարցով է պատասխանել. «Իսկ ձերոնք ովքե՞ր են»:
Հետապնդողն ասել է. «Ես ղարաբաղցի եմ, դու մերոնցակա՞ն ես»:
Տուժողը կարճ է կապել. «Բոլորս էլ հայ ենք»:
Նա շրջվել է ու ոչինչ չկասկածելով՝ շարունակել է ճանապարհը: Բայց զգացել է, որ անծանոթը շարունակում է իր հետևից գալ: Այլևս ուշադրություն չի դարձրել նրա վրա: Սակայն քիչ անց թիկունքին երկու ուժգին հարված է զգացել: Շրջվել ու տեսել է, որ հարվածողը նույն մարդն է:
Տուժողը սկզբում չի հասկացել, որ իրեն հարվածել են դանակով: Նա կռացել է, որ քար վերցնի ու խփի անծանոթին, բայց գլուխը պտտվել է, նա վայր է ընկել:
Անծանոթը դանակը ձեռքին հարձակվել է ընկածի վրա, սկսել է հարվածել: Մի հարվածը դիպել է ընկածի որովայնի շրջանին, թափանցող վնասվածք է պատճառել, մյուս հարվածներից տուժողը պաշտպանվել է ձեռքերով, միաժամանակ բարձր ձայնով օգնություն է կանչել:
Մոտակա կանգառից մի տղամարդ շտապել է օգնության: Նա տեսել է, որ մի տարեց տղամարդ կքանստած՝ հարվածներ է հասցնում գետնին ընկած մեկ ուրիշ տղամարդու:
Մոտեցողը բարձրաձայն հայհոյել է հարվածողին, որ նա դադարեցնի հարվածները:
Դանակահարողը մոտեցողին տեսնելով, նրա ձայնը լսելով՝ վախեցել ու փախել է:
Տուժողին տեղափոխել են հիվանդանոց, որտեղ նրա կյանքը փրկվել է:
Տուժողի ստացած վնասվածքները նրա առողջությանը ծանր վնաս են հասցրել:
Դատահոգեբուժական փորձաքննության եզրակացությամբ՝ Վարազդատ Ա.-ն տառապել ու տառապում է «Շիզոֆրենիա, զառանցական ձև, դեֆեկտային վիճակ» հոգեկան հիվանդությամբ:
Վարազդատը դեռ 1970 թվականից հաշվառված է նյարդահոգեբուժական դիսպանսերում, բազմիցս ստացիոնար բուժում է ստացել հոգեբուժական հիվանդանոցներում: Նա երկրորդ խմբի հաշմանդամ է:
Վարազդատի մոտ, ըստ եզրակացության, առկա է մտածողության ճեղքվածություն, պարալոգիզմ, շիզոֆրենիային բնորոշ՝ անձի փոփոխություններ, հետաքրքրության շրջանակի խիստ նեղացում, հուզակամային ոլոտի իջեցում, աշխատունակության անկում: Իրավախախտումը կատարելիս նա գտնվել է հիվանդագին խանգարված վիճակում, արարքը կատարել է զառանցական ապրումների ազդեցության տակ, ինչը նրան զրկել է իր գործողությունները ղեկավարելու հնարավորությունից:
Վարազդատ Ա.-ն ճանաչվել է անմեղսունակ:
Դատարանը որոշել է Վարազդատ Ա.-ին ազատել քրեական պատասխանատվությունից ու պատժից, նրա նկատմամբ կիրառել բժշկական բնույթի հարկադրական միջոց՝ հարկադրական բուժում հատուկ հսկողության հոգեբուժական բաժանմունքի պայմաններում:
