Չեխիայի գործող նախագահ Վացլավ Կլաուսի կինը՝ Լիվիան, նախագահական ընտրությունների երկրորդ փուլում աջակցել է նախկին վարչապետ Միլոշ Զեմանին։ Այս մասին հաղորդում են տեղական ԶԼՄ-ները։
Զեմանը և առաջին փոխվարչապետ, Չեխիայի ԱԳՆ նախարար իշխան Կարել Շվարցենբերգը կմրցեն նախագահական ընտրությունների երկրորդ փուլում, որը կկայանա հունվարի 25-26-ը։
Կլաուսովան նշել է, որ Զեմանն ամբողջ կյանքն անց է կացրել Չեխոսլովակիայում, այնուհետև Չեխիայում և լավ է հասկանում հայրենակիցներին։ Ըստ նրա՝ չնայած որ Զեմանն իր ամուսնու քաղաքական հակառակորդն է եղել, բայց նա «միշտ իր խոսքի տերն է եղել»։ Կլաուսովան նաև հավելել է, որ չի ցանկանա իբրև երկրի առաջին տիկին տեսնել Թերեզա Շվարցենբերգին, ով միայն գերմաներեն է խոսում։
Իշխան Կարել Շվարցենբերգը 1948-ին ծնողների հետ արտագաղթել է Չեխոսլովակիայից և կյանքի մեծ մասն անցկացրել է Ավստրիայում։ Նա հայրենիք է վերադարձել 1989-ին՝ թավշյա հեղափոխության հաղթանակից հետո։ Շվարցենբերգի կինը ծնունդով Ավստրիայից է, որտեղ գերմաներեն են խոսում։
Չեխիան առաջին անգամ է համաժողովրդական ընտրութրուններով նախագահ ընտրում, այդ մասին անցյալ տարվա փետրվարին սահմանադրական օրենք է ընդունվել։ Մինչդ այդ երկրի նախագահն ընտրվում էր խարհրդարանի երկու պալատների ընդհանուր նիստում։ Այդպես են ընտրվել Վացլավ Հավելը (1993-2003) և գործող նախագահ Վացլավ Կլաուսը (2003-ից)։ 2013-ի մարտին ավարտվում է Կլաուսի նախագահական երկրորդ ժամկետը։ Ըստ երկրի սահմանադրության՝ նախագահը երրորդ անգամ անընդմեջ առաջադրվելու իրավունք չունի։
