ԱՄՆ Փենսիլվանիա նահանգի 5-ամյա բնակչուհուն մեկուսացրել են մանկապարտեզի պարապմունքներից, քանի որ մանկական հաստատության աշխատակազմը նրա խոսքերում «ահաբեկչական սպառնալիք» է նկատել: Ինչպես հաղորդում է տեղի աղբյուր Penlife-ը, աղջիկը սպառնացել է կրակել ընկերուհուն օճառի փրփուրներով՝ խաղալիք ատրճանակի միջոցով, իսկ հետո այդ նույն զենքով «ինքնասպանություն» գործել:
Ըստ աղջնակի փաստաբան Ռոբին Ֆիկերի՝ պատահարը տեղի է ունեցել հունվարի 10-ին Մաունթ-Կարմել վայրում, երբ աղջնակն իր հասակակիցների հետ սպասելիս է եղել ավտոբուսին: Փաստաբանը նշել է, որ իր պաշտպանյալը երբեք չի օգտվել իսկական հրազենից, և այդ զրույցի ժամանակ նրա մոտ նույնիսկ չի եղել իր վարդագույն «օճառի» ատրճանակը:
Զրույցի մասին հայտնի է դարձել տեղի դպրոցական շրջանի վարչակազմին, և հաջորդ օրը օրինախախտին հարցաքննել են առանց ծնողների ներկայության: Կես ժամ տևած զրույցից հետո որոշվել է, որ աղջնակն իրենից «ահաբեկչական սպառնալիք» է ներկայացնում և 10 օր պետք է մեկուսացվի պարապմունքներից, ինչպես նաև նրան պետք է հետազոտի հոգեբանը:
