Իմ ներքին համոզմամբ՝ մենք սահմանել էինք ժամանակավոր բռնապետություն, հայտարարել է Վրաստանի պաշտպանության նախկին նախարար Իրակլի Օքրուաշվիլին՝ «9-րդ ալիք» հեռուստաընկերության եթերում: Այս մասին տեղեկացնում է apsny.ge-ն:
Նա խոսել է այն շրջանի մասին, երբ ինքը ևս եղել է Վրաստանի կառավարության անդամ: Նրա խոսքով՝ նախորդ իշխանությունների առաջին քայլերն ուղղված էին կարգուկանոնի հաստատմանը և կանխարգելիչ բնույթ են կրել:
«Այն ժամանակ մենք դիտարկում էինք սահմանադրական փոփոխությունները: Ինձ հանդիպեց Դավիթ Ուսուպաշվիլին ու հարցրեց՝ ի՞նչ եք անում, այսպիսի սահմանադրական փոփոխություններից երկրում փաստացի քանդվում է քաղաքական հավասարակշռությունը: Ես այն ժամանակ ասացի՝ իմ ներքին համոզմամբ, մենք սահմանում ենք ժամանակավոր բռնապետություն: Բայց բոլորն էին տեսնում, որ այդ «ժամանակավոր դիկտատուրան» շարունակվել է 9 տարի»,- նշել է Օքրուաշվիլին:
Նրա խոսքով՝ «վարդերի կառավարությունն» այն ժամանակ այլընտրանք չուներ: Նա խոստովանել է, որ թույլ են տրվել շատ սխալներ, որոնք օբյեկտիվ տեսանկյունից, հիմքեր ունեցել են:
