Մինչև այսօր թուրքական մամուլը Հրանտ Դինքի սպանությունը փորձում է ներկայացնել այնպես իբր դա եղել է մի խումբ ազգայնականների ձեռքի գործ, և պետականությունը կապ չունի դրա հետ, սակայն ստիպված եմ հիասթափեցնել՝ Դինքի սպանությունը տարեցտարի ավելի լայն արձագանք է գտնում աշխարհի կողմից, և բոլորն էլ իրականում հասկանում են, որ Դինքին փորձեց լռեցնել հենց Թուրքիայի կառավարությունը: Այսօր լրագրողների հետ հանդիպման ժամանակ այս մասին ասաց պատմական գիտությունների թեկնածու Գևորգ Մելքոնյանը:
«Հրանտի սպանությունը Հայոց ցեղասպանության տրամաբանական շարունակությունն էր: Քանի դեռ Թուրքիայի պետականությունը չի ճանաչել Հայոց ցեղասպանությունը՝ Թուրքիայում ապրող որևէ հայի կյանքն ապահովագրված չէ»,- ասաց նա:
Բանախոսը նաև կարծիք հայտնեց, որ Դինքի սպանությունը կազմակերպելու մասին տեղյակ են եղել իշխանության վերին օղակներում. «Երբ Հրանտին սպանեցին, հազարավոր թուրքեր դուրս եկան փողոց՝ հայտարարելով «մենք Հրանտ Դինք ենք»: Այս ամենը տանում է նրան, որ թուրքական իշխանությունը հենց թուրք հասարակության ճնշման ներքո կճանաչի Հայոց ցեղասպանությունը: Հրանտին սպանողն ընդամենը տասնյոթ տարեկան էր, նա չէր կարող ինքնուրույն այդպիսի որոշում կայացնել, պարզ է, որ կառավարությունն է ստիպել նրան այդ ոճիրը գործել: Հրանտի սպանության գործը փակված չեմ համարում, որովհետև այսօր ազատազրկված են միայն կատարողները, իսկ կազմակերպիչները մինչ այսօր ազատ են»:
Հիշեցնենք, որ վեց տարի առաջ այս օրը, Թուրքիայում «Ակօս» շաբաթաթերթի գլխավոր խմբագիր, հայ լրագրող Հրանտ Դինքը սպանվեց թուրք տասնյոթամյա ազգայնականի կողմից:
