«Յունիֆիշ» ընկերությունը դադարեցրել է ձկան արտահանումը Ռուսաստան: «Այս պահին նոր շուկաներ գտնելու խնդիր ունենք, բանակցություններն ընթացքի մեջ են, ուզում ենք ԱՄՆ-ի և Դուբայի շուկաներ դուրս գալ, որտեղ վաճառքն իրականացվում է դոլարով»,- «Առաջին լրատվական»-ին տեղեկացրին ընկերությունից:
Հայ տնտեսվարողների համար ձկան արտահանման հիմնական շուկան շարունակում է մնալ Ռուսաստանը, որտեղ վերջին շրջանում, պայմանավորված ռուբլու արժեզրկմամբ, ոչ նպաստավոր պայմաններ են ստեղծվել նրանց համար: Մյուս կողմից էլ՝ Ռուսաստանը իրավիճակը հսկողության տակ պահելու և գնաճը մեղմելու համար կոշտ քաղաքականություն է սկսել վարել՝ որոշ ապրանքների գների համար հստակ սահմանագիծ դնելով: Ստեղծված իրավիճակը մեր գործարարների համար իսկապես մտահոգիչ է, որովհետև խոսքը լուրջ ֆինանսական կորուստների մասին է:
«Յունիֆիշը» ձկնարտադրության ոլորտի ամենախոշոր ընկերություններից է, որը տարեկան ավելի քան 1500 տոննա արտադրանք է թողարկում, և եթե ընկերությունն արդեն փակել է ռուսական շուկայի դռները, ուրեմն լրջագույն խնդրի առջև են փոքր և միջին ծավալներով աշխատող ընկերությունները:
«Հայ ձկնարտադրողների միության» նախագահ Արթուր Աթոյանը հրաժարվեց պատասխանել «Առաջին լրատվական»-ի հարցերին՝ նշելով, որ հանդիպումների է: Սա՝ այն դեպքում, երբ ոլորտի բոլոր խնդիրների մասին մեկնաբանություններով վերջինս միշտ բաց է եղել լրատվամիջոցների համար:
Եվս 5 ձկնաբուծարաններ այս հարցի առնչությամբ մեկնաբանություն չտվեցին՝ պատճառաբանելով, որ տնօրենները տեղում չեն: Այս լռությունը պայմանավորված է ոլորտում առկա խուճապով, և ներքին փոխհամաձայնությամբ որևէ տեղեկատվություն չի տրամադրվում:
Մինչև վերջերս ձկան արտահանման հետ կապված խնդիրներ չեն եղել: Այս մասին «Առաջին լրատվական»-ի հետ զրույցում հայտնեց էկոնոմիկայի նախարարության Արդյունաբերության քաղաքականության վարչության պետ Արմեն Եգանյանը:
«Ստեղծվել էր ֆորս-մաժորային իրավիճակ, բայց գնալով կայունացում նկատվում է։ Մինչև այս ձկան արտահանման հետ կապված խնդիրներ ունեցել ենք հիմնականում Ռուսաստանի սննդի անվտանգության տեսչության հետ»,- հայտնեց պաշտոնյան՝ նշելով, որ գնաճը մեղմելու Ռուսաստանի քաղաքականության մասին իրենց վարչությունը տեղեկություն չունի, քանի որ դա իրենց իրավասությունների շրջանակում չէ:
Արտահանման քաղաքականության տեսանկյունից, ձկնարտադրությունը ռեսուրսներով ոլորտ է։ Վերջերս գյուղնախարար Սերգո Կարապետյանը, Ռուսաստանում հանդիպելով իր գործընկերոջը, աշխատանքներ տարավ, որպեսզի Հայաստանի ձկնաբուծական տնտեսությունները, որոնք նախկինում չէին ընդգրկվել ՌԴ արտահանման ցուցակում, նույնպես ստացան ձուկ ներմուծելու իրավունք:
Այս ամենին զուգահեռ, շուկան ռուսական կախվածությունից ազատականացնելու և այլընտրանքային շուկաներ գտնելու տեսանկյունից հուսադրում է միայն այն, որ 2015-2017 թթ. Եվրամիության փորձաքննությանն է ներկայացվելու նաև Հայաստանում արտադրվող ձուկը: Մինչև փորձաքննության ավարտը տնտեսավարողները նոր մարտահրավերը հաղթահարելու համար ինքնուրույն պետք է գործեն, որովհետև խնդիրն օրակարգային է, և հապաղելու դեպքում ոլորտը կոլապս կապրի:
