Մեծ Բրիտանիան կարող է դուրս գալ ԵՄ կազմից, եթե Բրյուսելը չհամաձայնի եվրոպական հասարակությունում Թագավորության մասնակցության ձևաչափի փոփոխմանը: Այս մասին հայտնի է դառնում երկրի վարչապետ Դևիդ Քեմերոնի ելույթի քաղվածքներից: Նա այսօր ելույթով պետք է հանդես գար Ամստերդամում,- փոխանցում է ITAR-TASS-ը:
Ծրագրվում էր, որ Նիդերլանդների մայրաքաղաքում նա հստակ պատասխան կտա առաջիկա տարիներին ԵՄ-ի հետ իր երկրի հարաբերությունների հարցին: Քեմերոնն այդ ելույթը, որի վրա աշխատել է մի քանի ամիս, համարում է Միացյալ Թագավորության արտաքին քաղաքականության համար առանցքային: Սակայն Ալժիրում նավթագազային համալիրում գրոհայիների կողմից օտարերկրացիների պատանդման պատճառով վարչապետը ստիպած է մնալ Լոնդոնում՝ ղեկավարելու ճգնաժամի հաղթահարմանն ուղղված ջանքերը:
Քեմերոնի չկայացած ելույթի պատառիկներից պարզ է դառնում, որ նա ցանկանում է ևս մեկ անգամ հաստատել, թե կցանականար՝ ապագայում Մեծ Բրիտանիան կարևորագույն և ակտիվ դեր խաղար ԵՄ-ում, սակայն ներկայիս հակասությունների պահպանման դեպքում դա նրան քիչ հավանական է թվում:
Քեմերոնի խոսքով՝ ներկայումս ԵՄ գլխավոր խնդիրներն են հանդիսանում եվրոգոտու տնտեսական ճգնաժամը, անբավարար մրցունակությունը և ֆեդերատիվ Եվրոպայի գաղափարին հանրության աջակցության զգալի նվազումը:
«Եթե ստատուս քվոն պահպանվի, մտավախություն կա, որ եվրոպական նախագիծը կձախողվի: Առկա խնդիրների արհամարհումը կստիպի բրիտանացիներին շարժվել ելքի ուղղությամբ»,- նշվում է վարչապետի ելույթի տեքստում:
«Ես չեմ ցանկանում, որ դա տեղի ունենա: Ես հաջողություն եմ ցանկանում Միացյալ Եվրոպային և ձգտում եմ հարաբերություների այնպիսի ձևաչափի, որը թույլ կտա մեզ մնալ ԵՄ-ում: Կառույցում Մեծ Բրիտանիայի մնալու համար հենց ԵՄ-ն պետք է փոխվի»,- ասել է նա:
