Ադրբեջանական SalamNews.org կայքի հաղորդմամբ, իշխող «Ենի Ազերբայջան» կուսակցության գործադիր փոխքարտուղար, Միլլի մեջլիսի (խորհրդարան) պատգամավոր Մուբարիզ Գուրբանլըն անդրադարձ է կատարել ընդդիմության չարտոնված ցույցի կանխմանը.
«Այդ միտինգը կանխվել է այն նույն մեթոդով, որը գործում է բոլոր քաղաքակիրթ երկրներում: Այն, որ «Հասարակական պալատ հանուն ժողովրդավարացման» քաղաքացիական շարժումը միտինգի անցկացման համար ընտրել էր հենց Շատրվանների հրապարակը, խոսում է նրա խորաթափանցության մասին. այդ վայրը մշտապես լեփ-լեցուն է մարդկանցով: Դրանով ընդդիմությունը հնարավորություն կստանար թմբկահարելու, թե իրենց բողոքի ակցիան բազմամարդ է եղել:
Միևնույն ժամանակ միտինգի կազմակերպիչներին ի սկզբանե զգուշացվել է, որ Ադրբեջանն «իրավական» երկիր է, և, դրա հետ կապված, ապօրինի ակցիաները կկասեցվեն:
Շաբաթօրյա միտինգը ցույց տվեց, որ ադրբեջանական ժողովուրդը դեմ է արմատականությանը: Այսուհետ ընդդիմությունը, նմանատիպ բողոքի ակցիաներ պլանավորելիս, պետք է գիտակցի, որ եթե այս անգամ իրենց բողոքի ակցիային ներկա են գտնվել տասնյակ մարդիկ, ապա հաջորդ անգամ կմասնակցեն միայն հատուկենտ մարդիկ»:
Հիշեցնենք, որ իշխող «Ենի Ազերբայջան» կուսակցությունը հիմնադրվել է 1992 թվականի դեկտեմբերի 18-ին: 2009 թվականի վերջի դրությամբ, կուսակցությունն ուներ 518.000 անդամ:
2010 թվականի նոյեմբերի 7-ին կայացած խորհրդարանական ընտրությունների արդյունքներով կուսակցությունը ստացավ Միլլի Մեջլիսի 125 մանդատներից 72-ը:
Իսկ ահա «Հասարակական պալատ» քաղաքացիական շարժումը ձևավորվել է նախորդ տարվա դեկտեմբերի վերջին` ի պատասխան նոյեմբերի 7-ին Ադրբեջանում հերթական անգամ կեղծված ընտրությունների:
