«Ղրիմում բնակվող հայերն ունեն այն բոլոր խնդիրները, որ ունեն Ռուսաստանում բնակվող մնացած բոլոր ազգերը, այդ թվում՝ ռուսները»,- «Առաջին լրատվական»-ի հետ զրույցում այս մասին ասաց Ղրիմի հայ համայնքի նախագահ Վաղարշակ Մելքոնյանը` ի պատասխան մեր հարցի, թե ի՞նչ խնդիրներ ունեն հայերը Ղրիմում․ «Առանձնահատուկ խնդիրներ չկան, ամեն ինչ ընդհանուր է ժողովրդի համար»,-ընդգծեց նա:
Բացի այդ, մեր զրուցակիցը հավելեց, որ դեկտեմբերի 13-ին ՌԴ արդարադատության նախարարությունը վավերացրել է տարածաշրջանային ազգային մշակութային ինքնավարության ստեղծումը:
Նրա խոսքերով՝ Ռուսաստանում կա օրենք ազգային մշակութային ինքնավարությունների վերաբերյալ, որը նախատեսում է երեք կարգավիճակ՝ տեղական-քաղաքային ինքնավարություն, տարածաշրջանային և դաշնային՝ համառուսական ինքնավարություն, իսկ Ուկրաինայում նման բան չկար․ «Տարիներ շարունակ Ուկրաինայում ապրելով՝ մենք նման բան չէին կարող անել, իսկ հիմա ստացել ենք այդ հնարավորությունը: Բացի մեզնից, դա անում են նաև գերմանացիները, հույները, բուլղարացիները: Մենք՝ այս չորս ժողովուրդները, միավորվել ենք մեկ ասոցիացիայում, որը մեզ ծրագրեր իրականացնելու համար ՌԴ պետբյուջեից գումար ստանալու հնարավորություն է ընձեռում»:
Մելքոնյանի պնդմամբ՝ այս ասոցիացիան կօգնի պայքարել իրենց իրավունքների պաշտպանության համար․ «23 տարվա ընթացքում մենք չգիտեինք՝ Ղրիմում հայերն ինչ կարգավիճակ ունեն և ինչ հնարավորություններ, իսկ ՌԴ կազմում այս ասոցիացիան հիմնելով՝ ամեն ինչ հստակ է դառնում:
Ղրիմի այս ժողովուրդների ռեաբիլիտացիայի համար ծրագրեր են մշակվում Ռուսաստանում, որոնց համար հատկացվել է 11 միլիարդ ռուբլի, և այս ծրագրերը շարունակվելու են մինչև 2020 թվականը:
