Բուքինգհեմյան պալատի ներկայացուցիչները հերքել են Մեծ Բրիտանիայի թագուհի Էլիզաբեթ II-ի՝ առաջիկայում գահից հրաժարվելու մասին շշուկները: Այս մասին հայտնում է The Daily Telegraph-ը:
Այդ շշուկների պատճառը Coral բուքմեյքերական ընկերության գործողություններն են: Ընկերությունը դադարել է խաղադրույքներ ընդունել այն բանի վրա, որ 88-ամյա թագուհին գահից հրաժարվելու մասին կհայտարարի ժողովրդին հղված ավանդական ուղերձի ժամանակ՝ դեկտեմբերի 25-ին:
Սովորաբար բուքմեյքերական ընկերությունները դադարում են խաղադրույքներ ընդունել, երբ կասկածում են, որ խաղադրույք կատարողները սպասվող իրադարձության մասին նախապես տեղյակ են:
Սրա հետ կապված՝ Բուքինգհեմյան պալատի ներկայացուցիչը հայտարարել է. «Մենք չենք մեկնաբանում բուքմեյքերական ընկերությունների աշխատանքը»: Միաժամանակ նա հիշեցրել է, որ թագուհին գահին բազմելիս երդվել է, որ «իր ամբողջ կյանքը կնվիրի երկրին ծառայելու գործին, անկախ նրանից՝ այն կարճ կլինի, թե երկար»:
Բացի դրանից՝ թագավորական պալատի ներկայացուցիչները թերթին ասել են, որ թագուհու ամանորյա խոսքը նախօրոք է ձայնագրվում և մի քանի անգամ է հեռարձակվում տարբեր ժամային գոտիների համար: Նրանց խոսքով՝ թագուհին այդ կարևոր հայտարարությունն անելու համար չէր ընտրի նախօրոք ձայնագրված խոսքը:
