«Եթե մեկ տարվա կտրվածքով ներդրումների նվազման մասին ենք խոսում, ապա դա պայմանավորված է եղել մեծ, խոշոր ծրագրերի առկայությամբ, որոնք ավարտվել են, և դա բերել է նրան, որ անցած տարվա ներդրումները նախորդ տարվա համեմատ նվազել են, բայց դա միտում համարել չի կարելի»,- ասաց ՀՀԿ-ական պատգամավոր, ԱԺ ֆինանսավարկային և բյուջետային հանձնաժողովի նախագահ Գագիկ Մինասյանը՝ պատասխանելով «Առաջին լրատվական»-ի այն հարցին, թե տնտեսության աճը նվազող ներդրումների պայմաններում կարո՞ղ է կայուն լինել:
Ըստ Գ.Մինասյանի՝ 11 ամիսների ցուցանիշներով ունենք բավականին մեծ տնտեսական աճ՝ 7 %, որը տարվա ընթացքում կպահպանվի, արտահանման աճի տեմպերը մոտ 2.5 անգամ գերազանցում են ներմուծման աճի տեմպերին, ունենք բավականին ցածր գնաճ, սպառողական գների գնաճին գերազանցող միջին աշխատավարձի աճ: Գ. Մինասյանը նշեց, որ տնտեսական աճի ամենամեծ ներդրումը կատարել են արդյունաբերությունը և գյուղատնտեսությունը, ակնկալիքն այնպիսին է, որ վերջին տարիների ընթացքում շինարարության անկումը կդադարի:
Թե որքանով է ՀՀ տնտեսությունը մոտեցել նախաճգնաժամային շրջանի մակարդակին, ՀՀԿ-ական պատգամավորը հորդորեց սպասել մինչև տարեկան ցուցանիշների ամփոփումը:
Նշենք, որ ՀՀ նախկին նախագահ Ռոբերտ Քոչարյանն իր հարցազրույցում կասկած էր հայտնել տնտեսության աճի վերաբերյալ. «Տնտեսությունը սկսել է աճել, բայց արդյո՞ք այդ աճը կայուն կլինի նվազող ներդրումների պայմաններում, և որքանո՞վ է այն պայմանավորված լինելու պարտքերի կուտակմամբ: Չէ՞ որ նույնիսկ ՀՆԱ-ի 2012 թ. սպասվելիք 7 % աճի պարագայում մենք համադրելի թվերով չենք հասնելու 2008 թ. մակարդակին (98 %), հատկապես ՀՆԱ-ի հանդեպ պետական պարտքի ավելի քան եռակի աճի պայմաններում (այն էլ` պարտքի կառուցվածքի վատթարացմամբ)»: