«Ղարաբաղը կորցնելու վտանգ կա, դրա համար ազատամարտիկներս պետք չենք»,- «Առաջին լրատվական»-ի հետ զրույցում ասաց ազատամարտիկ Ռազմիկ Պետրոսյանը՝ անդրադառնալով վերջին օրերին ՀՀ փոխոստիկանապետ Լյովա Երանոսյանի տված հարցազրույցներին օրերս Ռազմիկ Պետրոսյանի և Մանվել Եղիազարյանի նկատմամբ ոտնձգությունների մասին:
Նա նշեց, որ Լյովա Երանոսյանին այլևս ընկեր չի համարում, ընկեր չի համարում նրան, ով կարող է հրավիրել հանդիպման, գրկախառնվելով հրաժեշտ տալ, բայց դրսում կազմակերպել այնպիսի վիճակ, որ ծեծեն իր ընկերներին, իսկ դրանից հետո իրավունք վերապահել իրեն՝ ասելու, թե խմած են եղել, ոտքները «սոթ է տվել»՝ ընկել են:
«Մենք բացարձակապես սթափ վիճակում ենք դուրս եկել, նույնիսկ երիտասարդներին փորձել ենք սթափեցնել, ասել, որ խնդիր չի եղել, զգուշացրել ենք նրանց, որ ներսում գեներալի հետ ենք նստած եղել, իրենք տեղյակ են, բայց նրանց հանձնարարություն էր տրված, և ես չէի մտածում, որ հանձնարարությունը Լյովայի կողմից է տրված»,- ասաց ազատամարտիկը:
Տեղի ունեցածի նպատակը, նրա համոզմամբ, վախի մթնոլորտի ձևավորումն է: