Մարսի վրա ջրի առկայության որոնման նպատակով Curiosity-ն պատրաստվում է հորատման: Օպերացիան ծրագրվում է անցկացնել Գեյլա խառնարանում՝ առաջիկա մի քանի օրերին: Այս մասին հայտնել են NASA-ի Ռեակտիվ շարժման լաբորատորիայի մասնագետները՝ փոխանցում է ITAR-TASS-ը:
Մարսագնացը, որը Կարմիր մոլորակի մակերևույթին վայրէջք է կատարել 5 ամիս առաջ, պետք է հարթ սալից նմուշներ վերցնի՝ ուսումնասիրելու համար դրանց կառուցվածքը և քիմիական բաղադրությունը:
Սալը գտնվում է 500 մետր արևմուտք այն վայրից, որտեղ վայրէջք է կատարել մարսագնացը: NASA-ի ընտրությունը այդ գոտու վրա է կանգնել այն պատճառով, որ գիշերն այնտեղ զովանում է նկատելիորեն դանդաղ, քան Կարմիր մոլորակի մնացած շրջաններում: Այդ առանձնահատկությունը նշված շրջանն առանձնացնում է հետազոտությունների համար:
