«Վախի մթնոլորտով փորձում են ձևավորվել որպես Սերժ Սարգսյանի ժառանգորդներ»,- այս մասին այսօր «Առաջին լրատվական»-ի հետ զրույցում ասաց «Արաբո» ջոկատի հրամանատար Մանվել Եղիազարյանն՝ անդրադառնալով ՀՀ փոխոստիկանապետ Լյովա Երանոսյանի տված հարցազրույցներին՝ իր և ազատամարտիկ Ռազմիկ Պետրոսյանի նկատմամբ իրագործված ոտնձգությունների մասին, որոնցում, ըստ մամուլի տեղեկությունների, շրջանառվում է Լյովա Երանոսյանի թիկնազորի տղաների մասնակցությունը:
«Արաբո» ջոկատի հրամանատարը փորձեց պարզաբանել այն, թե ինչ է կատարվում երկրում և ինչ է թաքնված բռնությունների ալիքի հետևում: Նա նշեց, որ իշխանական օղակներում մի երկու բլոկ է հայտնվել, որոնք ուզում են ձևավորվել որպես Սերժ Սարգսյանի ժառանգորդ: «Ուզում են վախի մթնոլորտով Սերժ Սարգսյանին ցույց տալ, որ իրենք են հաջորդը: Ժառանգորդի թեկնածուները, ֆիզիկական ուժ գործադրելով, ցանկանում են Սերժ Սարգսյանին ապացուցել, որ իրենք են ժառանգորդները, նվիրված են, իրենք կարող են ապահովել Սերժ Սարգսյանի անվտանգությունը, եթե իշխանությունը տա իրենց»,- ասաց Մանվել Եղիազարյանը:
Վերջինս նշեց, որ հետագա գործողությունների զարգացումը կախված է իրավիճակից: Ինչ վերաբերում է միջադեպին, ապա Մանվել Եղիազարյանը խուսափեց մեղավորների անուններ տալուց և Լյովա Երանոսյանին մեղադրելուց: