«Վախենում եմ, որ կկրկնվի 18 թվականը. Արցախը մենք անջատեցինք մեզնից՝ մտնելով ԵՏՄ»,- «Առաջին լրատվական»-ի հետ զրույցում ասաց «Սասուն» ջոկատի հիմնադիր-հրամանատար, «Քաղաքացիական պայմանագրի» կառավարման խորհրդի անդամ Սասուն Միքայելյանը՝ անդրադառնալով ազատամարտիկների համախմբմանը:
Նա նշեց, որ իրավունք չունեն չհամախմբվելու նման իրավիճակում: «Եթե մենք էլի հանկարծ ժողովրդին հանեցինք, թողեցինք փողոցում, էլ ոչինչ չենք կարող անել: Ինչպես սպարապետն էր ասում՝ ով ոնց ուզի գլուխներս կխուզի»,- ասաց նա:
Նա նշեց, որ ինքը ևս մտահոգ է, որ ՀՀ իշխանությունները զիջումների կգնան Լեռնային Ղարաբաղի հարցում: «Ես էլ եմ մտահոգ, որովհետև մենք այսօր Արցախը թողել ենք ուրիշի, օտարի հույսին: Մենք Արցախը մեզանից անջատել ենք ԵՏՄ մտնելով, հասկանո՞ւմ եք: Արցախն այսօր ուրիշ հանրապետություն է: Այսինքն՝ մենք փաստացի ֆիքսեցինք ամբողջ աշխարհում, որ Արցախը Հայաստանի Հանրապետության սահմանում չէ: Նազարբաևը հայտարարեց, թե ճշտել են՝ արդեն սահմանների հետ կապված պրոբլեմ չունեն: Բնական է, ես էլ եմ մտահոգ, համոզված եմ, որ մենք խնդիր կունենանք: Վախենում եմ, որ 18 թիվը կրկնվի, որովհետև 18 թվականին նման ներքաղաքական վիճակ է եղել, սխալ վարած արտաքին քաղաքականություն դրա հետևանքով, և այսօր, երբ շատ մարդիկ գոռում-գոչում են, որ անվտանգության երաշխավորն է ԵՏՄ-ն, ես դրանում համոզված չեմ, որովհետև 15 թվականին ռուսները գնացին հասան մինչև Էրզրում, ես միշտ կրկնում եմ, որ միլիոնուկես զենք տվին թուրքերին, միլիոնուկես հայ փրթվավ»,- մեկնաբանեց Սասուն Միքայելյանը:
Նա ազատամարտիկների նկատմամբ բռնությունները վախի մթնոլորտի ամրապնդման փորձ որակեց: «Նույն բանը եղավ 2008թ., երբ ինչ-որ բան պիտի կատարվի, մի բան ուզում են անեն այս իշխանությունները, ես չեմ ասում հենց Արցախի հարցի հետ կապված, տարօրինակ է, հասկանում եք: Ու չի կանխվում իշխանությունների կողմից: Միայն սուտ հայտարարություններ»,- նշեց Սասուն Միքայելյանը:
