«Վախեցնողը մենք ենք մնացել, բա ինչի՞ չենք ասում, զգուշացնում»,-այսօր Եռաբլուրում հրավիրված ազատամարտիկների մեծ հավաքի ընթացքում այս մասին ասաց ազատամարտիկ Մուշեղ Սաղաթելյանն՝ անդրադառնալով իր մարտական ընկերների նկատմամբ օրերս կատարված ոտնձգություններին:
Նա նշեց, որ իրենց պատժում են, եթե այս պատիժն էլ կուլ տան, այն ժամանակ կռվելու են Մոսկվայի հետ, կորցնելու են ամեն ինչ, ուստի սա ավելի գլոբալ, մեծ կռիվ է: «Հետո գլխներիս չտանք, 17թ. -18 թվականի պես ծեծեցինք կուլակներով ու վռնդեցինք, որ հարուստ չեղնի, հիմա կռվում ենք, որ քյասիբ չեղնի: Ո՞րս ենք ճիշտ: Դրա համար հիմիկվանից պետք է սկսենք մտածել»,- ասաց նա՝ հավելելով, թե չի հասկանում՝ ինչու են իրենք այս ողջ ընթացքում լռել: Նա ասաց, որ չի ցանկանում, որ զենք վերցնեն գնան կռվեն, հային չի կարելի սպանել, բայց այլ մեթոդներ կան: «Վախեցնողը մենք ենք մնացել, բա ինչի չենք ասում, զգուշացնում»,- ասաց նա:
Հիշեցնենք, որ դեկտեմբերի 10-ի հանրահավաքի ժամանակ ազատամարտիկ Սմբատ Հակոբյանն էր տեղեկացրել, որ այսօր հավաք է անցկացվելու: Եռաբլուր էին ժամանել մարզերից, քանի որ նրանց խիստ վրդովվեցրել են իրենց մարտական ընկերների նկատմամբ կատարվող բռնությունները: