Այսօր քաղաքագետների միության նախագահ Հմայակ Հովհաննիսյանից փորձեցինք պարզել, թե ինչ նպատակ են հետապնդում Հայաստանում իրենց գոյությունը երկարաձգող գաճաճ կուսակցությունները։
Նրա խոսքերով, նրանք արտահայտում են այդ խմբակներում համախմբված մի քանի մարդկանց հետաքրքրությունները և նրանց իշխանությունների հետ սակարկություններին մասնակցելու ձգտումը։
«Դրանք սովորաբար խմբակներ են, որոնք առաջանում են, ինչ-որ ամբիցիոզ մարդկանց, անհատների շուրջ։ Այդ անհատները այն մարդիկ են, որոնք իրենց այդ խմբակներն անվանում են կուսակցություններ։
Կուսակցությունը ոչ թե մի քանի մարդու անձնական նկրտումների արտահայտիչ է, այլ պետք է արտահայտի նաև այս կամ այն սոցիալական խմբի կամ շերտի հետաքրքրությունները։
Այս խմբակների մեծամասնությունն իրենց առաջարկում են իշխանություններին, որովհետև միայնակ ի վիճակի չեն զարգանալու, ծավալվելու, ուստի ստիպված են ընդհատվել, ստիպված են իրենց գործունեությունը կամ հնարավորությունները ընդլայնելու համար ապավինել իշխանությունների աջակցությանը, հովանավորությանը»,- պարզաբանեց Հմայակ Հովհաննիսյանը և ավելացրեց, որ ապավինելով այդպիսի հնարավորություններին` նման կուսակցությունները չեն կարող հեռու գնալ։