Իտալիայի նախկին արտգործնախարար Ֆրանկո Ֆրատինին հավակնում է ՆԱՏՕ-ի նոր գլխավոր քարտուղարի պաշտոնին: Այս մասին իտալական La 7 հեռուստաալիքի եթերում հաղորդել է երկրի նախկին վարչապետ Սիլվիո Բեռլուսկոնին:
«Նա ցանկանում է դառնալ ՆԱՏՕ-ի քարտուղար, և նրան անհրաժեշտ է, որ Իտալիայի կառավարությունը իր համաձայնությունը տա»,- հայտարարել է Բեռլուսկոնին:
Միաժամանակ, Բեռլուսկոնին Ֆրատինիին անվանել է իր ընկերը:
«Մենք նրա հետ հիանալի համագործակցել ենք: Նա ունի ընկերներ գտնելու կարողություն, օրինակ` նա բացառապես վստահելի հարաբերությունների մեջ է գտնվում տիկին Քլինթոնի հետ»,- ասել է նախկին վարչապետը:
Հիշեցնենք, որ 2012թ. հոկտեմբերին ՆԱՏՕ-ի ներկա քարտուղար Անդերս Ֆոգ Ռասմուսենի չորսամյա մանդատը երկարաձգվել է ևս մեկ տարով՝ մինչև 2014թ. հուլիսի 31-ը: Այս որոշման նախաշեմին ակտիվ շշուկներ էին տարածվել այն մասին, որ Ռասմուսենին կարող է փոխարինել հենց Ֆրատինին: