Իրանը պատրաստ է իր միջուկային ծրագրին վերաբերող ցանկացած տեխնիկական հարց լուծել Ատոմային էներգիայի միջազգային գործակալության հետ բանակցություններում: Այս մասին Թեհրանում կոնֆերանսի ժամանակ հայտարարել է Իրանի ԱԳՆ ներկայացուցիչ Ռամին Մեհմանպարաստը՝ փոխանցում է Press TV-ն:
Նրա խոսքով՝ չորեքշաբթի Թեհրանում կանցկացվեն բանակցություններ իրանցի պաշտոնատար անձանց և ԱԷՄԳ-ի ներկայացուցիչների միջև: Նա հույս է հայտնել, որ կողմերը փոխըմբռնման կհասնեն:
«Մենք միշտ պատրաստ ենք երկխոսության, եթե հակադիր կողմը պատրաստ է ընդունել միջուկային ծրագիր իրականացնելու Իրանի իրավունքը»,- ասել է Մեհմանպարաստը:
Նրա խոսքով՝ Իրանը հակված է իր պարտավորությունների կատարմանը: Իրանը ստորագրել է Միջուկային զենքի չտարածման մասին պայմանագիրը և ձգտում է դրա իրագործմանը:
Մեկնաբանելով վերջերս Իրանի հոգևոր առաջնորդ այաթոլլա Ալի Խամենեի հայտարարությունը` միջուկային զենքի վերաբերյալ, Մեհմանպարաստը ասել է. «Գերագույն առաջնորդ այաթոլլա Ալի Խամենեին վերջերս գաղափարական տեսակետ է արտահայտել միջուկային զենքի վերաբերյալ, և դա շատ արժեքավոր է մեզ համար: Մենք նույնիսկ պատրաստ ենք գրանցել դա որպես միջազգային փաստաթուղթ»,- ասել է ԱԳՆ ներկայացուցիչը:
Ավելի վաղ այաթոլլա Ալի Խամենեին հայտարարել էր, որ Իրանը երբեք չի ունենա միջուկային զենք, քանի որ դա մեղք է:
