Վրաստանում խորհրդարանական փոքրամասնության ներկայացուցիչները պահանջում են արտգործնախարար Մայա Պանջիկիձեի հրաժարականը Լիտվա կատարած այցի շրջանականերում Լեռնային Ղարաբաղի վերաբերյալ արած հայտարարության պատճառով,- հաղորդում է GHN-ը:
Պատգամավորների խոսքերով՝ Պանջիկիձեի հայտարարությունը Լեռնային Ղարաբաղի մասին նոր սկանդալի պատճառ է դարձել հայկական ԶԼՄ-ներում:
Խորհրդարանական փոքրամասնության ներկայացուցիչները կարծում են, որ Պանջիկիձեն պետք է պատասխան տա իր բոլոր բառերի համար:
«Մենք Բիձինա Իվանաշվիլիից պահանջելու ենք շատ շուտով պաշտոնից հեռացնել Մայա Պանջիկիձեին»,- հայտարարել է Ակակի Միաշվիլին:
Նրա խոսքերով՝ արտգործնախարարի գործունեությունը կործանարար ազդեցություն է թողնում Վրաստանի իմիջի վրա:
«Մենք կարող ենք հիշել Լիտվայում արած չմտածված հայտարարությունը, որի հետևանքով վարչապետի այցը Հայաստան գտնվում է տապալման շեմին»,- հայտարարել է պատգամավորը:
Հիշեցնենք, որ ԶԼՄ-երում տեղեկատվություն էր տարածվել այն մասին, որ Պանջիկիձեն, խոսելով Լեռնային Ղարաբաղի հակամարտության մասին, հայտարարել է, թե հակամարտությունը կարելի է կարգավորել միայն «հօգուտ Ադրբեջանի տարածքային ամբողջականության»:
