«Առավոտ»-ը զրուցել է Կոտայքի մարզպետ Կովալենկո Շահգալդյանի հետ (ներկայացնում ենք մի հատված):
– Ժամանակին Կոտայքի մարզից պատգամավոր ընտրված, այժմ ՀԱԿ անդամ Սասուն Միքայելյանն այսօր էլ որոշակի ազդեցություն ունի այդ տարածաշրջանում: Որքանո՞վ է սա Ձեզ մտահոգում՝ նախագահական ընտրությունների տրամաբանության մեջ: Ի՞նչ հարաբերությունների մեջ եք Սասուն Միքայելյանի հետ այժմ:
– Այդ ազդեցությունը դրսևորվեց և՛ Հրազդանի քաղաքապետի ընտրություններով, և՛ Ազգային ժողովի ընտրություններով, որտեղ Ձեր կողմից նշված անձնավորությունը, երկու թեկնածուի պարագայում, հայտնվեց պատվավոր երկրորդ տեղում: Իսկ ինչ վերաբերում է մեր հարաբերություններին, ապա ասեմ, որ մենք միմյանցից տրամագծորեն տարբերվող մտածելակերպ և դաստիարակություն ունեցող մարդիկ ենք:
– Սասուն Միքայելյանը տարեվերջին լրագրողների հետ զրույցում ասաց, որ առաջիկայում պատրաստվում է քաղաքական հայտարարությամբ հանդես գալ՝ նկատի առնելով այն հանգամանքը, որ նա ներկա չէր ՀՀՇ համագումարին, և պտտվող խոսակցությունները, որ Սասուն Միքայելյանի հարաբերություններն առաջին նախագահի և ՀԱԿ-ի հետ առաջվանը չեն, ըստ Ձեզ՝ ի՞նչ հայտարարություն է անելու Սասուն Միքայելյանը, ի՞նչ խոսակցություններ են Ձեզ հասել այդ առթիվ: ՀՀԿ-ն պատրա՞ստ է նրան ետ ընդունել:
– Ձեզ չի՞ թվում, որ այդ անձի մասին երկու հարցերում էլ անդրադառնալը փոքր-ինչ շատ է, բայց հարգելով լրագրողական Ձեր աշխատանքը՛ պետք է պատասխանեմ: Կարծում եմ, որ Ձեզ հուզող հարցը պետք է ուղղեիք այդ անձնավորությանը: Բայց, այնուամենայնիվ, հիշենք հայտնի ասացվածքը. «Չկան հավերժական թշնամիներ և հավերժական բարեկամներ, կան հավերժական շահեր»: Նայած թե այդ անձնավորության շահն այս պահին ինչի հետ կզուգորդվի: Չեմ կարող ասել: Միայն մի բան կարող եմ ասել՝ ՀՀԿ-ում մեկ անգամ գնացած հետ եկածներին երկրորդ հետ գալուց արդեն չեն ընդունում:
