Գարնանային գյուղատնտեսական աշխատանքները Սյունիքի մարզի ցածրադիր գոտիներում արդեն սկսվել են։
Սյունիքի մարզի գյուղական համայնքներում բնակվողները աշնանացանի արդյունքները գոհացուցիչ չեն համարում: Նրանք հետևում են գյուղնախարարի խորհրդին` աղոթում են, որ գարնանացանի արդյունքները գոնե բավարար լինեն: Սակայն միայն աղոթքով հարցը չես լուծի:
Գարնանացանի առաջին փուլի համար մարզում կատարվել է 2880 հեկտար ցրտահերկ։ Ընդհանրապես մարզում կատարվում է 9-12 հազար հա գարնանացան, որից 9 հազարը հացահատիկային մշակաբույսերի ցանքսն է:
Հանրապետություն ներկրված գարու սերմնացուից Սյունիքին հատկացվել է 99 տոննա, սակայն ըստ պատասխանատուների` սա չի բավականացնի ֆերմերային տնտեսություններին: Կարտոֆիլի սերմնացուի խնդիր էլ ունեն: Մարզպետարանի ներկայացրած պահանջարկի համաձայն` մարզ կներկրվի կառավարության կողմից հատկացված 5 տ կարտոֆիլի էլիտար սերմնացու, ևս 3 տ առաջին վերարտադրության կարտոֆիլի որակյալ սերմնացու նախատեսվում է ներկրել լրացուցիչ:
Սերմնացուից բացի, կան նաև վառելիքի, պարարտանյութի խնդիրներ: Անցած շաբաթ Սյունիքում գտնվող ՀՀ գյուղատնտեսության նախարար Սերգո Կարապետյանը գյուղացիներին հուսադրեց, խոստումներ տվեց, որ տեխնիկայի հարցն էլ կլուծեն, սակայն սյունեցի գյուղացիները այնքան էլ վստահ չեն, գիտեն, որ իրենք պիտի իրենց գլխի ճարը տեսնեն:
«Սկի Գերասիմը չէր անում` սյունեցի լինելով, մնաց սա անի, բիզնեսմեն մարդ ա էլի, կամանդիրովկայա եկել, որ շեֆերի աչքին թոզ փչի»,- գյուղնախարարի այցը այսպես մեկնաբանեցին Արծվանիկ գյուղի ֆերմերները: Ի դեպ, նշենք, որ նախկին գյուղնախարար Գերասիմ Ալավերդյանը ծնունդով կապանցի է:
