Երբ շոկոլադը երկար ժամանակ պահում են, այն պատվում է սպիտակ փառով: Դա բորբոս չէ և ոչ մի կերպ չի վնասում օգտագործողի առողջությանը կամ չի փչացնում դրա սննդային հատկանիշները, սակայն այդ փառը փչացնում է շոկոլադի տեսքը, և մասնագետները նախընտրում են նման շոկոլադ չօգտագործել, գրում է Vesti.ru-ն:
Ֆրաունգոֆերի ինստիտուտի գիտնականներն ուսումնասիրել են այդ ֆենոմենը և պարզել, թե ինչի հետևանքով է առաջանում այդ փառը և թե ինչպես է հնարավոր այն կանխել:
Բոլոր նրանք, ովքեր հետաքրքրվել են շոկոլադի պատրաստման տեխնոլոգիայով, գիտեն, որ այն շատ զգայուն է ջերմային պրոցեսների նկատմամբ: Այդ պատճառով էլ շոկոլադ արտադրողները մեծ գումարներ են ծախսում այնպիսի սալիկներ արտադրելու համար, որոնք առանց սառնարանի կդիմանան թեկուզ հասարակածային տապին և չեն կորցնի իրենց համային հատկանիշները:
Սովորական, արհեստական «համեմունքներով» չհարստացված շոկոլադը հալեցնելիս ոչ միայն կչուն զանգվածի է վերածվում, այլ փոխում է իր տեսքը: Այդ փոփոխություններից մեկն էլ սպիտակ փառն է, որն ի հայտ է գալիս քաղցրավենիքի սխալ պահպանման արդյունքում:
Այս փառը հաճախ առաջանում շոկոլադը փոփոխական ջերմաստիճանում պահելու արդյունքում:
Գերմանացի մասնագետները պատմել են, որ ամանորյա շոկոլադե քաղցրավենիքների մեծ մասը սկսում են արտադրել հուլիսին, քանի որ ընկերությունները պետք է ապրանքի բավարար քանակ ապահովեն: Բայց ապրանքը մի քանի ամիս պահպանվում է և ամանորին արդեն լավ տեսք չի ունենում:
Սակայն, ամենամեծ խնդիրն իր մեջ թաքցնում է շոկոլադե ջնարակը, որով պատում են քաղցրավենիքները: Սննդամթերքները պատվում են հեղուկ շոկոլադով: Այն անցկացնում են սառեցնող սարքի միջով, որտեղ շոկոլադը պնդանում է՝ վերածվելով հարթ մակերեսի:
Արտադրության հենց այս փուլում էլ շոկոլադի մակերեսին սկսում են հավաքվել ճարպի մոլեկուլները: Դրա պատճառով շոկոլադը դանդաղ է բյուրեղանում, ծածկույթը չափազանց փափկում է և ճարպային մասը սպիտակ փառի է վերածվում:
Ուսումնասիրողների խոսքերով՝ ճարպի մեծ քանակություն ստացվում է կոկոսի կամ արմավենու յուղից: Փորձագետները կարծում են, որ անթերի փայլուն շոկոլադ կարելի է ստանալ ջերմային կարգավորումների միջոցով:
