Սիրիական զորքերը զսպում են ԴԱԻՇ-ի («Իրաքի և Շամի իսլամական պետություն») զինյալների գրոհները Դեյր էզ Զորի ռազմական օդանավակայան, որը Եփրատի հարավային ափին կառավարական ուժերի վերջին հենակետն է: Այս մասին հայտնում է SANA գործակալությունը:
Ըստ ստացվող տեղեկությունների՝ ԴԱԻՇ-ի գրոհայիններին հաջողվել է հինգշաբթի օրը ճեղքել պաշտպանության առաջնային գիծը և գրավել օդանավակայանի ցանկապատի մոտ գտնվող Հովեյջա-Սաքր և Էլ-Ջեֆրա շրջանները: Նրանք պայթեցրել են բանակային զորանոցներից մեկը և հաշվեհարդար տեսել գերի ընկած 24 զինվորների հետ:
Սիրիական ռազմաօդային ուժերը հարվածում են հակառակորդին: SANA-ն հաղորդում է «օդանավակայանի մատույցներում տասնյակ սպանված ահաբեկիչների», նրանց լքված զրահամեքենաների և զենքերի մասին:
Հաջող գործողություն է իրականացվել Դեյր էզ Զորից 10 կմ հեռու գտնվող Մրեյա քաղաքում, որտեղ գտնվել է ԴԱԻՇ-ի շտաբներից մեկը: Այնտեղ նաև ոչնչացվել են մեծ թվով գրոհայիններ, գրավվել ռազմական տեխնիկա:
