Հայաստանի տարբեր կլինիկաների բժիշկ-ատամնաբույժներն այսօր բողոքի ակցիա անցկացրին նախագահականի մոտ: Նրանք ՀՀ նախագահ Սերժ Սարգսյանից պահանջում էին վերանայել վերջերս ընդունված այն որոշումը, ըստ որի` յուրաքանչյուր զբաղեցրած բազկաթոռի համար ատամնաբույժը ամսական 15.000 դրամի փոխարեն պետք է վճարի 80.000 դրամ:
Ակցիայի մասնակիցներից բժիշկ-ստոմատոլոգ Մայրանուշ Բարսումյանը, ով ունի մոտ 30 տարվա աշխատանքային ստաժ, նշեց, որ նախագահի կողմից ընդունված այս հրամանը շատ վիրավորական է և ապացուցում է, որ մենք հաստատ դեպի ապահով Հայաստան չենք գնում:
«Այստեղ հավաքվել են մարդիկ, որոնց աշխատատեղերի կայացման համար պետությունը մեկ լումա անգամ չի ներդրել: Ատամնաբույժները վճարում են տեղի վարձ, բուժքույրերի, սանիտարկաների, ջրի, լույսի, ջեռուցման համար՝ չհաշված, որ այդ նույն բազկաթոռների համար մենք ամսական վճարում ենք 15. 000 դրամ: Պետությունը մեկ լումա անգամ չի ներդրել այս աշխատատեղերի համար և հիմա անում է հերթական ոտնձգությունը: Առանց նայելու, առանց կարդալու` հրամաններ են ստորագրում, ամեն մի բազկաթոռի համար 80.000 դրամ վճար են սահմանել: Հիվանդն արդեն այլևս չի կարող բուժել ատամը, որովհետև եթե թանկացնեն բազկաթոռի վարձը, մենք էլ ստիպված ենք լինելու բարձրացնել մեր մատուցած ծառայությունների գինը, ստիպված գալու են միայն ատամ հեռացնելու համար, որովհետև սա համեմատաբար էժան է»,- ասաց նա:
«Միքս Դենտ» ատամնաբուժարանի տնօրեն Անդրանիկ Ավետիսյանի կարծիքով` սա եղել է շատ նեղ շրջանակներում կայացված որոշում. «Դաշտը մոնոպոլիզացնելով` մեծ ատամնաբուժարան են ուզում ստեղծել, որ մեզ բոլորիս կանչեն այնտեղ աշխատելու»:
