Նկարչուհի Թրեյսի Էմինը ներկայացրել է Brit Awards երաժշտական մրցանակի, որը «Գրեմմիի» բրիտանական նմանակն է համարվում, արձանիկի նոր դիզայնը: Հաղթողներին մրցանակների հանձնման արարողությունը կկայանա փետրվարի 25-ին Լոնդոնում և կհեռարձակվի ուղիղ եթերով, հաղորդում է BBC News-ը:
Կնոջ տեսք ունեցող արձանիկը վարդագույն է: Արձանիկի վրա գրառում է արված. «Շնորհակալություն ձեր տաղանդի, ձեր կյանքի, այն ամենի համար, ինչ դուք տալիս եք ուրիշներին»:
«Ես ցանկանում էի ոչ միայն զարդարել արձանիկը, այլև լավ դիզայն անել, որպեսզի Brit Awards-ի հաղթողները տուն գնան ինչ-որ յուրահատուկ բանով»,- իր աշխատանքը մեկնաբանել է Էմինը:
Brit Awards-ը հիմնվել է 1977 թ., իսկ 1982 թ. սկսած հանձնվում է ամեն տարի: Տարբեր ժամանակներում դափնեկիրներ են դարձել The Beatles-ը, Մայքլ Ջեքսոնը, Ռոբի Ուիլյամսը, Coldplay-ը, Queen-ը և Eurythmics-ը: Մրցանակի առանձնահատկություններից մեկն այն է, որ արձանիկի դիզայնը պարբերաբար փոխվում է:
