Վերաքննիչ քրեական դատարանում ավարտվեց Նժդեհ Ենոքյանի և Ցոլակ Ենոքյանի գործով բերված վերաքննիչ բողոքի քննությունը:
Գործը քննվել է Արմավիրի մարզի ընդհանուր իրավասության դատարանում Վահե Խալաթյանի նախագահությամբ:
Արմավիրի մարզի Սարդարապատ գյուղի 22-ամյա բնակիչ Նժդեհ Ենոքյանը նույն գյուղի նախկին բնակիչ, «օրենքով գող» Գոռ Ենոքյանի ազգականն է: Գոռ Ենոքյանը 2006 թվականից անհետ կորած է համարվում:
Գյուղում տարածված խոսակցություններից ու տարբեր աղբյուրներից Նժդեհն իմացել է, որ Գոռին Մոսկվայում սպանել է Սարդարապատ գյուղի բնակիչ, «Թեփ» մականունով Արմեն Եփրեմյանը, ով վերջին տասը տարիներին ապրել է Ռուսաստանում:
Նժդեհը խոստացել է անձամբ վրեժ լուծել Գոռ Ենոքյանի սպանության համար:
2013 թվականի նոյեմբերի 8-ին 41-ամյա Արմեն Եփրեմյանը կնոջ հետ ժամանել է Հայաստան՝ կնոջ հիվանդ հորը տեսակցության: Նոյեմբերի 10-ին Արմենի աները մահացել է:
Արմենն ու կինը բնակվել են կնոջ բարեկամուհու տանը՝ Սարդարապատ գյուղում:
Նժդեհ Ենոքյանն իմացել է, որ Արմեն Եփրեմյանը գյուղ է եկել: Նա իրենց տան մետաղե պահարանից վերցրել է Գոռ Ենոքյանի եղբայր Ցոլակ Ենոքյանի անվամբ գրանցված որսորդական ողորկափող հրացանը, որը ժամանակին պատկանել է «օրենքով գող» համարված Գոռ Ենոքյանին:
Հենց այդ հրացանով է Նժդեհը ցանկացել վրեժխնդիր լինել:
Հրացանը Ցոլակ Ենոքյանը Ռուսաստան մեկնելուց առաջ՝ 2013 թվականի ապրիլին ի պահ էր հանձնել Նժդեհի հորը, ով զենքը պահել էր իրենց տան մետաղե պահարանում:
Հրացանը վերցնելով՝ Նժդեհը Գոռ Ենոքյանի դստեր ամուսնուց գնած մեքենայով սկսել է հետևել Արմեն Եփրեմյանին:
Նոյեմբերի 14-ին Նժդեհը դարանակալել է այն տան մոտ, որտեղ հյուրընկալվել էր Արմեն Եփրեմյանը:
Ժամը 14-ն անց 30-ինՆժդեհը նկատել է, որ Արմենը կանգնած է տան դիմաց: Նա մեքենան հանգիստ վարելով՝ մոտեցել է Արմենին, մեքենան կանգնեցրել է, նշան է բռնել, կրակել վերջինիս թիկունքին՝ սրտի շրջանում, ու սպանել է:
Դրանից հետո Նժդեհ Ենոքյանը մեքենան արագ վարելով՝ դուրս է եկել գյուղից: Կատարվածի մասին տեղյակ է պահել Ռուսաստանից Հայաստան եկած Ցոլակ Ենոքյանին: Վերջինս ահազանգել է ոստիկանություն:
Ոստիկանները Նժդեհ և Ցոլակ Ենոքյաններին բերման են ենթարկել:
Նժդեհ Ենոքյանը դատարանում իրեն լիովին մեղավոր է ճանաչել դիտավորյալ սպանության համար՝ ՀՀ քրեական օրենսգրքի 104 հոդվածի 1-ին մասով: 47-ամյա Ցոլակ Ենոքյանն էլ իրեն մեղավոր է ճանաչել 239 հոդվածով:Նրանք դատարանում հրաժարվել են ցուցմունքներ տալուց:
Տուժողի իրավահաջորդը դատարանում պահանջել է, որ ՀՀ օրենքով ու մարդկային խղճի սահմաններում կայացվի դատավճիռը: Նա նյութական պահանջ չի ներկայացրել: Ասել է, թե իրենց ուժերով են կատարել սպանվածի հուղարկավորությունը, ուրիշի օգնությունը չեն ցանկանում, այն իրենց պետք չէ:
Ընդհանուր իրավասության դատարանը հաշվի է առել, որ Նժդեհ Ենոքյանը վատառողջ է, բնութագրվում է դրական: Որպես նրա պատասխանատվությունն ու պատիժը ծանրացնող հանգամանք՝ հաշվի է առել հանցանք կատարելու ռեցիդիվը. 2013 թվականի օգոստոսի 28-ի դատավճռով Նժդեհ Ենոքյանն այլ հանցագործության համար դատապարտվել էր 4 տարի ազատազրկման, նրա նկատմամբ պայմանական դատապարտություն էր կիրառվել ու սահմանվել 2 տարի փորձաշրջան:
Արմեն Եփրեմյանին դիտավորյալ սպանելու համար դատարանը մեղավոր է ճանաչել Նժդեհ Ենոքյանին ու դատապարտել 9 տարի ազատազրկման: Դրան մասնակիորեն գումարվել է նախորդ դատավճռով նշանակված պատիժը, ու վերջնական պատիժ է սահմանվել 9 տարի 6 ամիս ազատազրկումը:
Ցոլակ Ենոքյանը մեղավոր է ճանաչվել «Զենքի մասին» ՀՀ օրենքը խախտելով՝ այլ անձանց կողմից իր հրացանն օգտագործելու պայմաններ ստեղծելու համար, ինչը ծանր հետևանքներ է առաջացրել: Նա դատապարտվել 150 հազար դրամ տուգանքի:
Դատավճռի դեմ վերաքննիչ բողոք էր բերել մեղադրող դատախազ Ա. Սահակյանը:
Մեղադրողը վերաքննիչ քրեական դատարանում հիմնավորեց իր բողոքը և միջնորդեց, որ դատավճիռը պատժի մասով բեկանվի, կատարած արարքների համար ամբաստանյալ Ենոքյանները դատապարտվեն ավելի խիստ պատժի:
Նշանակված պատիժները, դատախազի կարծիքով, ակնհայտ մեղմ են, համաչափ չեն հանցանքներին:
Տուգանքի դատապարտված Ցոլակ Ենոքյանի մասով մեղադրողը միջնորդեց փոխել պատժատեսակը, ամբաստանյալին դատապարտել իրական ազատազրկման:
Վերաքննիչ դատարանը հարց ուղղեց Նժդեհ Ենոքյանին՝ արդյո՞ք նա սպանությունից առաջ լիովին հավաստի տեղեկատվություն ուներ, որ Գոռ Ենոքյանին Մոսկվայում սպանել է «Թեփ» մականունով Արմեն Եփրեմյանը:
Նժդեհը հայտնեց, որ իր ունեցած տեղեկությունն ինքը հավաստի է համարում, չնայած հորեղբոր մարմինը դեռ չի հայտնաբերվել:
«Ես ցանկացել եմ վրեժ լուծել հորեղբորս սպանության համար ու վրեժը լուծել եմ»:
Նժդեհն ընդունեց, որ ինքն է կատարել սպանությունը, ընդհանուր իրավասության դատարանի դատավճռի հետ լիովին համաձայն է, խնդրում է այդ դատավճիռը թողնել անփոփոխ:
Դատարանը նույն հարցն ուղղեց նաև մեղադրողին՝ մեղադրանքի կողմը, Նժդեհ Ենոքյանին մեղադրելով վրեժի հողի հողի վրա կատարված սպանության համար, արդյո՞ք հավաստի տեղեկություններ է ստացել, որ Գոռ Ենոքյանին սպանել է Արմեն Եփրեմյանը:
Դատախազն ասաց, թե ռուս իրավապահներից նման տեղեկատվություն պաշտոնապես չեն ստացել:
Գոռ Ենոքյանը դեռ համարվում է անհետ կորած, նրա մարմինը չի հայտնաբերվել:
Երկրորդ ամբաստանյալը՝ Ցոլակ Ենոքյանը, որ ազատության մեջ է, նույնպես իր համաձայնությունը հայտնեց ընդհանուր իրավասության դատարանի դատավճռի վերաբերյալ, առարկեց մեղադրողի բերած բողոքի դեմ:
Ցոլակ Ենոքյանն ասաց, թե իր տունը նորոգել է, հին պահարանը, որտեղ պահում էր իր որսորդական հրացանը, դեն է նետել: Ռուսաստան մեկնելուց առաջ ապահովության համար որսորդական հրացանը տվել է հորեղբորը, որ նա այն ապահով պահի իր տանը եղած մետաղե պահարանում:
Զենքը վստահել է հորեղբորը, որովհետև նա ազատամարտիկ է եղել, որսորդ է, զենքի հետ վարվելու ձևը գիտի:
Ինքը թողել է միայն զենքը՝ առանց փամփուշտների:
Ինչ վերաբերում է նրան՝ որտեղի՞ց է իրենց հայտնի դարձել, որ Արմեն Եփրեմյանն է սպանել Գոռ Ենոքյանին, Ցոլակ Ենոքյանն ասաց, թե իրենք դա իմացել են հենց տուժող կողմից: «Մենք երևի ամենավերջինն ենք իմացել, բոլորն էդ մասին գիտեին… »:
Ըստ Ցոլակ Ենոքյանի ունեցած տեղեկության՝ «Թեփը»՝ Արմեն Եփրեմյանը, «գազանաբար տանջամահ է արել» Գոռ Ենոքյանին: Նա այլ մարդկանց ևս առևանգել է, ծանր հանցանքներ է կատարել, «իսկական մարդակեր ա էղել»,- «Թեփի» մասին ասաց Ցոլակ Ենոքյանը: Միաժամանակ նա ասաց, թե զղջում է…
Վերաքննիչի նիստին չներկայացած տուժող կողմի դիրքորոշման վերաբերյալ Ցոլակ Ենոքյանն ասաց, թե տուժողի իրավահաջորդն ընդհանուր իրավասության դատարանում երկու նիստի է մասնակցել, հայտնել է, թե չի ցանկանում ներկա գտնվել դատական նիստերին: Տուժող կողմը որևէ պահանջ չի ներկայացրել:
«Իրենք գիտեին իրականությունը, դրա համար էլ չեզոք դիրք էին գրավել»,- ասաց Ցոլակ Ենոքյանը:
Նա համոզված տոնով ասաց, թե եղբոր՝ Գոռի դին ինքը շուտով Մոսկվայից Հայաստան է տեղափոխելու:
Վերաքննիչ քրեական դատարանը մեղադրողի վերաքննիչ բողոքը մերժեց:
Նժդեհ և Ցոլակ Ենոքյանների պատիժները չխստացվեցին, ընդհանուր իրավասության դատարանի դատավճիռը մնաց անփոփոխ: