Ռուսաստանը Ղարաբաղյան հակամարտությունում ինքնուրույն է գործում: «Առաջին լրատվական»-ի հետ զրույցում այս մասին ասաց ռուսաստանցի հեղինակավոր ռազմական փորձագետ, վերլուծաբան Պավել Ֆելգենգաուերն՝ անդրադառնալով ՀԱՊԿ-ում հայկական ռազմական ուղղաթիռի խոցման հարցի վերաբերյալ հնարավոր քննարկումներին:
Նա նշեց, որ այդ քննարկումներից էական արդյունք ակնկալել պետք չէ, քանի որ հայկական ուղղաթիռի հետ պատահած միջադեպը ՀԱՊԿ որևէ անդամի, բացի ՌԴ-ից, չի հետաքրքրում: Ըստ նրա՝ այս հարցում ՀԱՊԿ անդամ երկրները որևէ կերպ դիրքորոշում չեն հայտնելու և մտնելու նման լծի տակ:
«Ֆորմալ կերպով հարցը կդրվի քննարկման, հայկական կողմի կարծիքը կհրապարակվի, ինչ-որ գործընթացներ կլինեն, բայց ոչ էական արձագանք, բայց ես կասկածում եմ, որ կլինեն լուրջ արդյունքներ, առավել ևս՝ ոչ ՀԱՊԿ-ը, ոչ Բորդյուժան որևէ լուրջ բան չեն որոշում։ Ավելի որոշիչ է ՀՀ-ում ռուսական ռազմաբազաների գործոնը և նրանց պաշտպանական դերակատարությունը, սակայն այդ հարցը ՀԱՊԿ-ը չի որոշում, այլ Ռուսաստանը, իսկ ՀԱՊԿ-ն ինչպես չի զբաղվել, այնպես էլ չի զբաղվելու ԼՂ հակամարտությամբ։ Պարզապես կլինեն քննարկումներ, Բորդյուժայի հայտարարությունը հատուկ հայաստանյան լսողի համար է՝ ՀԱՊԿ-ը կքննարկի, բայց առանց էական արդյունքի, որ եկեք ասենք ինչ-որ հաճելի բան: Ղազախստանն ու Բելառուսն առավել ևս որևէ դեպքում չեն միջատելու Ղարաբաղյան գործերին: Դա իրենց չի վերաբերում, քանի որ ՀԱՊԿ-ը երաշխիքներ չի տվել Ղարաբաղին, միայն Հայաստանի տարածքներին»,- ասաց Պավել Ֆելգենգաուերը: Նա նշեց, որ Ռուսաստանը ԼՂ հակամարտությունում գործում է որպես ՄԽ համանախագահ երկիր:
«Այսինքն՝ նման հայտարարությունից ավելին, քան հայտարարությունը, չպետք է լուրջ վերաբերվել, քանի որ եղել է միայն սիրալիր քայլ հայաստանյան ունկնդրի համար»,- նկատեց Ֆելգենգաուերը: Վերջինս նշեց, որ Մինսկի խումբը վերջին տարիներին մեռած աշխատանք է վարում, կարելի է ասել, որ չի աշխատում, կամ այդ աշխատանքն արդյունքներ չի տալիս:
«Եվ ներկայում, երբ Ռուսաստանը հակամարտության մեջ է Արևմուտքի հետ, առավել ևս անարդյունավետ է դառնում այդ աշխատանքը: Բայց իհարկե կան ընդհանուր շահեր, բոլորը ցանկանում են, որ Ղարաբաղում խաղաղ ու լուռ լինի: Բայց դա այնպիսի համայնք է, որից այսօր որևէ լուրջ քայլ ակնկալել պետք չէ: Ռուսաստանը Ղարաբաղյան հակամարտությունում ինքնուրույն է գործում Երևանի և Բաքվի միջոցով, թեև ես վստահ չեմ, որ ներկայումս Վլադիմիր Պուտինն այդքան ժամանակ ունի Ղարաբաղով զբաղվելու համար: Հինգշաբթի ուղերձով է պատրաստվում հանդես գալ, իրավիճակը երկրում լուրջ է, տնտեսության վիճակը վատ է, ընկնում է նավթի գինը, Արևմուտքի հետ հակամարտությունը շարունակվում է, որի հետևանքով ՌԴ-ն ժամանակ չունի դրանով զբաղվելու համար, և երկրի ինտելեկտուալ ուժերը զբաղված են: Եթե իրավիճակը չափազանց պայթյունավտանգ դառնա, ՌԴ-ն ստիպված կլինի զբաղվել, իսկ հիմա դա դեռ առաջնային չէ»,- ասաց Պավել Ֆելգենգաուերը:
Հիշեցնենք, որ օրերս ՀՀ նախագահ Սերժ Սարգսյանն ընդունեց աշխատանքային այցով Հայաստանի Հանրապետություն ժամանած Հավաքական անվտանգության պայմանագրի կազմակերպության (ՀԱՊԿ) գլխավոր քարտուղար Նիկոլայ Բորդյուժային: Նրանք իրենց երկխոսության ընթացքում անդրադարձել էին օրերս ադրբեջանական զինված ուժերի կողմից ԼՂ ԶՈՒ ուսումնավարժական թռիչք իրականացնող ուղղաթիռի խոցման միջադեպին և դրա հետևանքով առաջացած իրավիճակին, որը, Նիկոլայ Բորդյուժայի հավաստմամբ, քննարկման թեմա կդառնա նաև ՀԱՊԿ Հավաքական անվտանգության խորհրդի նստաշրջանում:
