Վրաստանի նախագահ Միխեիլ Սաակաշվիլին վարչապետ Բիձինա Իվանիշվիլիին մեղադրել է արտաքին քաղաքականության գլխավոր ուղղությունը փոխելու մեջ։
Շաբաթ օրը նախագահական նստավայրում նոր նահանգապետներին ներկայացնելու ժամանակ Սաակաշվիլին հայտարարել է, որ Իվանիշվիլին իր վերջին հարցարզրույցի ժամանակ ասել է, թե ինքը ստիպված է եղել «հետ մղել Արևմուտքի և ԱՄՆ-ի հարվածները»՝ իր քաղաքականության անկախությունը պահպանելու համար։
Նախագահի խոսքով՝ վարչապետն իր քաղաքականությունը Արևմուտքից թեքում է դեպի Ռուսաստան, որի գործակալներին ազատում է բանտերից։
Ըստ Սաակաշվիլիի՝ չպետք է դավաճանել արևմտյան արժեքներին, որոնց հետ Վրաստանը կապված է շատ խոր հոգևոր ավանդույթներով։ Նա հիշեցրել է Դիդգորի ճակատամարտի մասին, որտեղ, նրա խոսքով, արևմտյան խաչակիրները կանգնել են վրացի եղբայրների կողքին։
Սաակաշվիլին մեղադրել է վարչապետի թիմին` իր քաղաքական հակառակորդներին կեղտոտ մեթոդներով ճնշելու համար։ Նա նշել է, որ Իվանիշվիլիի հակառակորդները ենթարկվում են անօրինական բռնությունների, նրանց հարազատների նկատմամբ շինծու գործեր է սարքվում։ Նախագահն ասել է, որ իր օրոք մարդու անձնական կյանքը անձեռնմխելի է եղել։
