«Վերջին 2 օրում Երևանում մեկը մյուսի հետևից «Նախախորհրդարանի» անդամների մեքենաների հրկիզումն ու քաղաքացիական ակտիվիստին դաժան ծեծի ենթարկելու փաստը լուրջ կասկածներ են ծնում, որ դա քաղաքական հալածանք է». այս մասին մեզ հետ զրույցում նշեց «Թրանսփարենսի Ինթերնեշնլ» հակակոռուպցիոն կենտրոնի գործադիր տնօրեն Վարուժան Հոկտանյանը:
«Սա առաջին նմանատիպ դեպքը չէ: Տեղի ունեցածը շատ լուրջ խնդիր է, լուրջ է նաև այն իմաստով, որ անընդհատ կրկնվում են նման դեպքերը: Եթե ոստիկանությունը պատշաճ արձագանք չտա, լրջորեն չհետաքննվեն այս դեպքերը, ապա կան լուրջ կասկածներ, որ այս ամենը գալիս է վերևից»,- ասաց նա:
Հարցին՝ արդյո՞ք նման դեպքերի նպատակը քաղաքացիական ու քաղաքական ակտիվությունը նվազեցնելը չէ, վախեցնելը չէ, Հոկտանյանը պատասխանեց. «Սա ես դիտում եմ ոչ այնքան քաղաքացիական հասարակության դեմ, որքան քաղաքական ուժերի: Ընդհանուր նպատակը, իհարկե, ներքին գրաքննության ուժեղացումն է, երբ ամեն բան չէ, որ անվտանգ է բարձրաձայնելը: Բայց կոնկրետ այս դեպքում ես տեսնում եմ քաղաքական հալածանք, որովհետև «Նախախորհրդարանը» ավելի շուտ քաղաքական պահանջներ է դնում»:
Դիտարկմանը, որ ոչիշխանական Եռյակի հանդեպ նման հալածանք չկա, Հոկտանյանն արձագանքեց. «Նախ՝ կապրենք կտեսնենք: Երկրորդ՝ եթե դա գալիս է իշխող քաղաքական ուժի կողմից, ապա երևի նրանք որոշել են, որ այս պահին «Նախախորհրդարանի» անդամներն ավելի վտանգավոր են: Շատ հարցեր կան, որոնց հեշտությամբ հնարավոր չէ պատասխանել: Տրամաբանորեն Եռյակն ավելի մեծ պոտենցիալ վտանգ պիտի ներկայացներ, բայց գուցե, հաշվի առնելով որոշակի նախապայմաններ, որ խնդիրն ավելի լուրջ դրվում է «Նախախորհրդարանի» կողմից, այսպես է որոշվել: Բոլոր դեպքերում, սա քաղաքական պատճառներ ունի և քաղաքական հաշվեհարդար է, եթե, իհարկե, ոստիկանությունը պատշաճ հետաքննություն չանցկացնի»:
Ավելին՝ տեսանյութում: