Համալսարանական կրթությամբ կանանց ասոցիացիայի 15-ամյակին նվիրված «Կանանց մտավոր ներուժը՝ ի նպաստ ժողովրդավարության և քաղաքացիական հասարակության կայացման» համաժողովի ընթացքում ասոցիացիայի նախագահ Ջեմմա Հասրաթյանը տեղեկացրեց, որ հիմնադրման օրվանից` 1995 թվից ի վեր ասոցիացիան աշխատել է ակտիվ մասնակցություն ունենալ այն բոլոր բարդ խնդիրների լուծմանը, որոնք կանգնած են եղել Հայաստանի առջև:
«Տարիների ընթացքում մենք փորձեցինք գտնել մեր տեղը հասարակության զարգացման գործընթացներում, մենք գիտակցում էինք, որ մեր ներուժը չպետք է անմասն մնա ժողովրդավարական, քաղաքացիական հասարակության ձևավորման գործընթացներից»,- ընդգծեց Հասրաթյանը և հավելեց, որ մենք իրավունք չունենք կողքից նայելու մեր երկրի խնդիրներին:
Հասրաթյանի խոսքերով, այս 15 տարիների ընթացքում իրականացվել են մի շարք ծրագրեր, որոնք նպաստել են Հայաստանում ժողովրդավարական գործընթացների խորացմանը:
Ասոցիացիայի նախագահը տեղեկացրեց, որ Հայաստանի բոլոր մարզերում ասոցիացիան ունի 35 մասնաճյուղ, ինչպես նաև ստեղծվել են մի շարք կենտրոններ, ինչպիսիք են Ժողովրդավարության և խաղաղության, Գենդերային հետազոտությունների, Գործողությունների քաղաքականության տեղեկատվական-վելուծական կենտրոնները և Կանաց լիդերության դպրոցը:
Համաժողովին ներկա էր նաև ԱԺ ՀՀԿ-ական պատգամավոր, ԵԽԽՎ տնտեսական հարցերով մշտական հանձնաժողովի նախագահ Հերմինե Նաղդալյանը, որը նշեց, որ կանայք մեծ ներուժ ունեն, և այդ ներուժը բարձրացնելու անհրաժեշտություն կա:
«Այս տարիների ընթացքում համալասարանական կրթությամբ կանանց ասոցիացիան կարողացավ հսկայական աշխատանք կատարել և մեծագույն հեղինակություն ձեռք բերել ինչպես երկրի ներսում, այնպես էլ դրսում: Ներքին կարևոր բոլոր պրոցեսներում մեր ասոցիացիայի խոսքի հետ հաշվի են նստում, ինչպես նաև միջազգային հեղինակավոր ֆորումների ժամանակ է հաշվի առնվել ասոցիացիայի կարծիքը»,- կարծիք հայտնեց Նաղդալյանը:
