Թաիլանդի կառավարությունը մտադիր է մի շարք սկանդալներից հետո արգելել կոմերցիոն փոխնակ մայրությունը: Այս մասին հայտնում է BBC-ի ռուսական ծառայությունը:
Խորհրդարանը նախապես հաստատել է օրենքի նախագիծը, որը որպես նման գործունեության պատիժ սահմանում է մինչև 10 տարվա ազատազրկումը:
Օգոստոսին թաիլանդցի մի կին, որը երկվորյակ է կրել մի ավստրալացի զույգի համար, վերջիններիս մեղադրել է, որ նրանք հրաժարվել են տղայից, որի մոտ Դաունի համախտանիշ է հայտնաբերվել, բայց վերցրել են նրա երկվորյակ քրոջը:
Խորհրդարանի պատգամավորներից մեկի խոսքով՝ Թաիլանդը պետք է վերջ տա այն պրակտիկային, որ օտարերկրացիներն այդ երկրին վերաբերվում են որպես երեխաների արտադրության ֆաբրիկայի:
